Qazaqstan men Qatar arasyndaǵy reıster sany kóbeıedi
12:33, 03 Qarasha 2022
ASTANA. QazAqparat – Keler jyldan bastap Qazaqstan men Qatar arasyndaǵy reıster kúndelikti bolady. Bul týraly QazAqparat Indýstrııa jáne ınfraqurylymdyq damý mınıstrliginiń baspasóz qyzmetine silteme jasap habarlaıdy.
2023 jylǵy 3 qańtardan bastap qatarlyq avıakompanııa Almaty jáne Doha qalalary arasyndaǵy turaqty jolaýshylar reısteriniń sanyn aptasyna 4-ten 7-ge deıin arttyrýdy josparlap otyr. Eki el arasynda áýe qatynasy kúndelikti bolady.
Sonymen qatar, áýekompanııa 2023 jyldyń kóktemgi-jazǵy kezeńinde Qazaqstan men Katar astanalary – Astana men Doha arasynda reıs ashýdy josparlap otyr.
Reısterdi ulǵaıtý jáne ushý geografııasyn keńeıtý Qazaqstan men Qatar arasyndaǵy saýda-ekonomıkalyq, iskerlik, ınvestıtsııalyq jáne týrıstik yntymaqtastyqty odan ári damytýǵa yqpal etpek.