Qazaqstan men Katar arasynda áýe reısteriniń sany artady

NUR-SULTAN. QazAqparat - Azamattyq avıatsııa komıtetiniń tóraǵasy Talǵat Lastaev Qatar Memleketiniń avıatsııalyq bılik prezıdenti Mohamed Faleh Ál-Hadjrı myrzamen jáne Katar Memleketiniń Qazaqstandaǵy Tótenshe jáne Ókiletti Elshisi Abdýlazız Sultan Ál-Rýmeıhı myrzamen kezdesti, dep habarlaıdy QazAqparat.

Kezdesý barysynda taraptar azamattyq avıatsııa salasyndaǵy yntymaqtastyq máselelerin talqylady.

Atap aıtsaq, reıster sanyn odan ári arttyrý jáne Qazaqstan men Katar arasyndaǵy reıster geografııasyn keńeıtý, avıatsııalyq mamandardy oqytý jáne olardyń biliktiligin arttyrý, Qatarlyq kompanııalardyń ınvestıtsııalaryn Qazaqstanǵa tartý máseleleri sóz boldy.

Máselen, búgingi tańda «Qatar Airways» avıakompanııasy Doha-Almaty baǵyty boıynsha jıiligi aptasyna 4 ret turaqty jolaýshylar reısin oryndaıdy.

Katar tarapynyń aqparatynsha «Qatar Airways» áýe kompanııasy 2023 jylǵy kóktem-jaz merziminen bastap Nur-Sultan men Doha arasynda áýe qatynasyn ashýdy josparlap otyr.

Sondaı-aq taraptar Qazaqstan azamattyq avıatsııa ókilderin oqytý jáne biliktiligin arttyrý jóninde kelisti.

Taraptar 27 qyrkúıek pen 7 qazan aralyǵynda ótetin Halyqaralyq azamattyq avıatsııa uıymy (IKAO) assambleıasynyń 41-shi sessııasy máselelerin talqylady.