Qazaqstan men Qatar 1,3 mlrd dollardy quraıtyn jobalardy pysyqtap jatyr

<p>ASTANA. KAZINFORM &ndash; Búgin Senattyń jalpy otyrysynda &laquo;Qazaqstan Respýblıkasynyń Úkimeti men Qatar Úkimeti arasyndaǵy ınvestıtsııalardy ózara kótermeleý jáne qorǵaý týraly kelisimdi ratıfıkatsııalaý týraly&raquo; Zań maquldandy.</p>

Kelisimge 2022 jylǵy 12 qazanda Astana qalasynda qol qoıyldy. Zańdy qabyldaý ınvestıtsııalyq ahýaldy jaqsartýǵa múmkindik beredi, sondaı-aq elder arasyndaǵy ózara tıimdi saýda-ekonomıkalyq yntymaqtastyqty odan ári damytýǵa yqpal etedi.

«Qazaqstan Úkimeti men Qatar Úkimeti arasyndaǵy Investıtsııalardy qoldaý jáne ózara qorǵaý týraly kelisim elderdiń ózara ádil jáne teń quqyly ınvestıtsııalyq rejımin usynýǵa baǵyttalǵan. Bul Kelisim ekijaqtyń tyǵyz ekonomıkalyq yntymaqtastyqty arttyryp, sondaı-aq kásipkerlik bastamalardy yntalandyrý ári eki memlekettiń de ál-aýqatyn jaqsartý úshin qolaıly jaǵdaılar týǵyzady. Kelisimniń maqsaty - ár tarapqa qolaıly jaǵdaı jasap, teń quqyqty rejımdi rettep, ulttyq zańnamaǵa jáne halyqaralyq quqyqqa sáıkes qaýipsizdikti qamtamasyz etý», - dedi senator Bıbigúl Jeksenbaı.

Onyń aıtýynsha, keıingi jyldary Qatarmen ekijaqty saýda-ekonomıkalyq jáne ınvestıtsııalyq yntymaqtastyqty sapaly jańa deńgeıge kóterip, Memleket basshysynyń bastamalaryn iske asyrý boıynsha mańyzdy jumystar atqarylyp jatyr. Qazirgi kezde eki eldiń ulttyq kompanııalary men jeke sektorlary arasyndaǵy baılanys nyǵaıyp, ekonomıkanyń ártúrli sektorlarynda birqatar mańyzdy jobalar júzege asyp jatyr.

«Qazir qatarlyq kompanııalardyń ınvestıtsııalyq jobalar tizimine 1 mlrd 356 mln AQSh dollaryn quraıtyn 14 joba kiredi. Onyń ishinde 20 mln dollar quraıtyn 3 joba júzege asyp, 103 mln dollar sommasyndaǵy 2 joba qolǵa alyndy. Osyny eskere otyryp, bul zań ınvestıtsııalyq jaǵdaıdy odan ári jaqsartýǵa jáne eki el arasyndaǵy ózara tıimdi saýda-ekonomıkalyq yntymaqtastyqty damytýǵa yqpal etetinine senimdimin», - dedi depýtat.