Qazaqstan men Italııa parlamentaralyq dıalogty jandandyrmaq

NUR-SULTAN. QazAqparat - Beınekonferentsııa rejıminde Qazaqstan Premer-Mınıstriniń orynbasary – Syrtqy ister mınıstri Muhtar Tileýberdiniń Italııanyń Syrtqy ister jáne halyqaralyq yntymaqtastyq mınıstri Lýıdjı Dı Maıomen kelissózderi ótti.

Taraptar joǵarǵy jáne asa joǵary deńgeıdegi saıası dıalogty nyǵaıtýǵa ózara qyzyǵýshylyq tanytty. Bul rette strategııalyq áriptestik rýhynda yntymaqtastyqty odan ári damytýǵa ekijaqty beıildilik rastaldy, dep habarlaıdy QazAqparat QR Syrtqy ister mınıstrliginiń resmı saıtyna silteme jasap.

Taraptar ekijaqty kún tártibiniń búkil aýqymy boıynsha, onyń ishinde saıası, saýda-ekonomıkalyq, ınvestıtsııalyq jáne mádenı-gýmanıtarlyq salalarda pikir almasty. Sondaı-aq, halyqaralyq kún tártibindegi ózekti máseleler boıynsha pikir almasty. Sonymen qatar, mınıstrler parlamentaralyq dıalogty jandandyrý jáne shart-quqyqtyq bazany keńeıtý joldaryn talqylady.

Kelissózder qorytyndysy boıynsha birqatar halyqaralyq uıymdarda eki eldiń kandıdatýralaryn ózara qoldaý týraly ýaǵdalastyqqa qol jetkizildi.