Qazaqstan men Iran syrtqy ister mınıstrleri ne jaıyn talqylady
«Búgin biz Iran Islam Respýblıkasynyń Syrtqy ister mınıstri Mohammad Djavad Zarıfpen óte jemisti kezdesý ótkizdik. Onyń barysynda eki el arasyndaǵy yntymaqtastyqtyń qazirgi ahýalyna jáne onyń bolashaq damýyna sholý jasadyq. Nur-Sultan men Tegerannyń óńirlik jáne halyqaralyq máselelerge qatysty ózara ustanymdary boıynsha pikir almastyq. Búkil álemdi sharpyǵan COVID-19 pandemııasy halyqaralyq qatynastar júıesine eleýli áser etti. Osyǵan qaramastan, pandemııa qaýpi báseńdegen soń biz ekijaqty is-sharalardy ótkizý týraly ýaǵdalastyq», - dedi Muhtar Tileýberdi kezdesýden keıin BAQ ókilderine arnalǵan málimdemesinde.
Onyń atap ótýinshe, búgingi basqosýda Kaspııge qatysty ekijaqty jáne kópjaqty yntymaqtastyqqa basa nazar aýdaryldy. 2018 jyly Aqtaý qalasynda ótken Besinshi Kaspıı sammıtiniń tarıhı mańyzy erekshe atap ótildi. Kaspıı teńiziniń quqyqtyq mártebesi týraly konventsııanyń baptaryn oryndaý jáne Aqtaý sammıtinde qol jetkizilgen ýaǵdalastyqtardy júzege asyrý qajettigi kelisildi.
«Biz eki eldiń Birikken Ulttar Uıymy, Azııadaǵy ózara yqpaldastyq jáne senim sharalary jónindegi keńes, Islam yntymaqtastyq uıymy, Ekonomıkalyq yntymaqtastyq uıymy jáne taǵy basqa halyqaralyq jáne óńirlik uıymdar sheńberindegi ózara árekettestigin oń baǵaladyq. Eki memlekettiń saýda-ekonomıkalyq baılanysynyń kókjıekterin talqylap, kólik-tranzıt, aýyl sharýashylyǵy jáne taǵy basqa salalardaǵy ózara yqpaldastyqtyń qarqynyn ósirý qajettigin atap óttik», - dedi QR Syrtqy ister mınıstri.
Sonymen qatar taraptar Parsy shyǵanaǵy men Eýropa, Reseı jáne Qytaı naryqtaryna tez jetýge múmkindik beretin Ózen (Qazaqstan) – Bereket (Túrikmenstan) - Inchebýrýn (Iran) temir jolynyń áleýetin tolyq paıdalaný mańyzdylyǵyn ashyp aıtqan.
«2020 jyly Qazaqstan men Iran arasyndaǵy saýda aınalymy 237 mln dollardy qurap, 2019 jylǵa qaraǵanda 37,2 paıyzǵa tómendedi. Osy rette ártúrli jaǵdaıǵa baılanysty báseńdegen ekijaqty taýar aınalymy kólemin arttyrýǵa jan-jaqty qoldaý kórsetý joldaryn talqyladyq. Biz bul baǵyttaǵy ýaǵdalastyqtardy Qazaqstan-Iran saýda-ekonomıkalyq yntymaqtastyq jónindegi úkimetaralyq komıssııa aıasynda júzege asyrý qajet dep kelistik. Qazaqstan men Iran arasyndaǵy saýda aınalymynyń artýyna oń yqpal etýi tıis Iran men Eýrazııalyq ekonomıkalyq odaq arasynda qol qoıylǵan Erkin saýda aımaǵyn qurý jónindegi ýaqytsha kelisimdi tolyq formatty kelisimge aınaldyrý boıynsha kelissózder úderisin quptaımyz», - dedi Muhtar Tileýberdi.