Qazaqstan men Iran ózara taýar aınalymyn $3 mlrd-qa jetkizýdi kózdep otyr

<p>Tegeran qalasynda Qazaqstan men Iran arasyndaǵy saýda-ekonomıkalyq, ǵylymı-tehnıkalyq jáne mádenı yntymaqtastyq jónindegi úkimetaralyq komıssııanyń 19-shy otyrysy ótti, dep habarlaıdy <a href="https://kaz.inform.kz/" target="_blank" rel="noopener">Kazinform</a> Úkimettiń baspasóz qyzmetine silteme jasap.&nbsp;</p>

Qazaqstan Premer-Mınıstriniń orynbasary Serik Jumanǵarın men Iran aýyl sharýashylyǵy mınıstri Mohammad Alı Nıkbahttyń teń tóraǵalyǵymen ótken sharaǵa eki el mınıstrlikteri men memlekettik kásiporyndarynyń ókilderi qatysty.

Úkimetaralyq komıssııa otyrysynda taraptar saýda, aýyl sharýashylyǵy, logıstıka, energetıka, densaýlyq saqtaý, bilim berý, týrızm jáne basqa da salalardaǵy memleketaralyq qatynastardyń tabysty damyp kele jatqanyn atap ótti.

Serik Jumanǵarın eki memlekettiń basshylary Qazaqstan men Iran arasyndaǵy taýar aınalymyn úsh mıllıardtyq mejege jetkizý mindetin qoıǵanyn eske saldy.

«Osy tapsyrmany oryndaýdyń alǵashqy qadamy Ózara taýar aınalymyn $3 mlrd-qa jetkizý jónindegi is-sharalar josparyna qol qoıý bolady. Qujat eksporttaýshy kásiporyndardy birneshe baǵytta qoldaýdy kózdeıdi: ózara saýda kólemin ulǵaıtý, saýda-sattyqtaǵy shekteýlerdi alyp tastaý, ekijaqty klırıng mehanızmin engizý jáne t.b.», — dedi vıtse-premer.  

Ol sondaı-aq qazaqstandyq kompanııalar Iran naryǵyna shıkizattyq emes taýarlardyń úzdiksiz eksportyn jolǵa qoıýǵa múddeli ekenin aıtty.

Óndirýshiler ırandyq tutynýshylarǵa jalpy somasy shamamen $250 mln bolatyn 75 taýar pozıtsııasy boıynsha ónim jetkizýge daıyn.

Sonymen qatar otyrys barysynda Serik Jumanǵarın EAEO-ǵa múshe memleketter men Iran arasynda erkin saýda týraly tolyqqandy kelisim jasasýda elderdiń qol jetkizgen jetistikterine oń baǵa berdi.

Irannyń aýyl sharýashylyǵy mınıstri Mohammad Alı Nıkbahttyń aıtýynsha, ırandyq kásiporyndar Qazaqstanǵa balyq jáne sút ónimderi, bal, jemister men kókónister, keptirilgen jemister jáne basqa da azyq-túlik ónimderin jetkizýdi uıymdastyra alady.

Sondaı-aq ırandyq tarap qazaqstandyq ınvestıtsııaǵa qyzyǵýshylyq tanytty. Tegeran Qazaqstannan kelgen ınvestorlarǵa Irannyń erkin ekonomıkalyq aımaqtarynda bıznes júrgizý úshin erekshe jaǵdaılar jasaýǵa daıyn.

Oǵan qosa Úkimetaralyq komıssııa aıasynda kólik-logıstıkalyq yntymaqtastyqty odan ári keńeıtý máselesi talqylandy. Atap aıtqanda, Soltústik-Ońtústik halyqaralyq kólik dálizderin damytý qaraldy. Kaspıı toraby bul baǵyttaǵy negizgi býynǵa aınalýy múmkin.

Qazaqstan Premer-Mınıstriniń orynbasary Tegeranǵa jumys sapary barysynda aýyl sharýashylyǵy, turǵyn úı-kommýnaldyq sharýashylyq, ınvestıtsııa, taý-ken jáne metallýrgııa ónerkásibi, ónerkásip jáne kólik salalaryndaǵy jetekshi ırandyq kásipkerlermen kezdesti.

Plenarlyq otyrys sońynda Qazaqstan Premer-Mınıstriniń orynbasary Serik Jumanǵarın men Irannyń aýyl sharýashylyǵy mınıstri Mohammad Alı Nıkbaht Qazaqstan Respýblıkasy men Iran Islam Respýblıkasy arasyndaǵy 19-shy birlesken úkimetaralyq komıssııanyń hattamasyna jáne Taýar aınalymyn $3 mlrd-qa deıin jetkizý jónindegi is-sharalar josparyna qol qoıdy.

Sonymen qatar úkimetaralyq komıssııanyń qorytyndysy boıynsha aýyl sharýashylyǵy jáne metrologııa salalaryndaǵy qujattarǵa qol qoıyldy:

• Qazaqstan men Irannyń Aýyl sharýashylyǵy mınıstrlikteri arasyndaǵy veterınarııa salasyndaǵy yntymaqtastyq týraly memorandým.

• Qazaqstan standarttaý jáne metrologııa ınstıtýty men Irannyń Ulttyq standarttaý uıymy Ulttyq metrologııa ortalyǵy arasyndaǵy metrologııa salasyndaǵy ózara túsinistik týraly memorandým.

Tegeranǵa jumys sapary barysynda Qazaqstannyń vıtse-premeri Irannyń aýyl sharýashylyǵy, TKSh, ınvestıtsııalar, TMK, ónerkásip jáne kólik salasyndaǵy kóshbasshy bıznesmenderimen kezdesti.