Qazaqstan men Iran logıstıkalyq ınfraqurylym jasaý úshin birlesken kásiporyn qurady

ASTANA. QazAqparat - «QTJ» UK» AQ basshysy Qanat Alpysbaev Iranda bolǵan saparynda «KTZ Express» AQ («QTJ» UK» AQ enshiles kásiporny) pen «Islamic Republic of Iran Shipping Lines (IRISL)» kompanııasy arasynda Qazaqstannyń Irandaǵy Tótenshe jáne Ókiletti Elshisi Baǵdat Ámireevtiń qatysýymen birlesken kásiporyn qurýdyń mańyzdylyǵyna oraı quryltaıshylyq kelisimdi tolyqtyrdy.

Bul týraly «Qazaqstan temir joly» UK» AQ baspasóz qyzmeti habarlady.

Aıta keterligi, 2016 jyly 22 jeltoqsanda Iran Islam Respýblıkasynyń prezıdenti Hasan Rýhanıdiń Qazaqstanǵa sapary barysynda «KTZ Express» AQ men Irannyń IRISL kompanııasy arasynda birlesken kásiporyn qurýy jónindegi quryltaıshylyq kelisimge qol qoıylǵan bolatyn.

Birlesken kásiporyndy 2017 jylǵy naýryzda iske qosý josparlanyp otyr. Bastapqy kezde kóliktik-logıstıkalyq qyzmet kórsetiledi. Sonymen qatar, Bender-Abbas portynda birlesken termınal qurylysy bıylǵy jyldyń tórtinshi toqsanynda bastalmaq.

Qolaıly kóliktik-logıstıkalyq ınfraqurylymdy damytý Iran men Qazaqstan arasyndaǵy kóliktik- logıstıkalyq qyzmet tıimdiligin kóterip qana qoımaıdy, TMD elderi, Kaspıı teńizi porttarynyń jáne basqa da mańyzdy baǵdarlardyń birge damýyna yqpal etedi. Bender- Abbas portynda ınfraqurylym jasaqtaý Parsy shyǵanaǵy elderi men Indııa jáne Afrıka porttaryna jol ashady.

Bolashaqta Inchebýrýn stantsııasy men Aqtaý portynda termınaldyq áleýetin damyta túsý kózdelip otyr.