Qazaqstan men Iran aýyl sharýashylyǵy salasyndaǵy yntymaqtastyqty jandandyrmaq

<p>ASTANA. KAZINFORM - Aýyl sharýashylyǵy vıtse-mınıstri Ermek Kenjehanuly Iran Islam Respýblıkasynyń Qazaqstandaǵy Tótenshe jáne Ókiletti Elshisi Álı Akbar Djoýkarmen kezdesti, dep habarlaıdy QR AShM baspasóz qyzmeti.&nbsp;</p>

Taraptar aýyl sharýashylyǵy salasyndaǵy ekijaqty yntymaqtastyqtyń negizgi máselelerin talqylady.

Ermek Kenjehanuly basym baǵyttardyń biri agrarlyq sektordaǵy ınvestıtsııalyq jobalardy iske asyrý ekenin atap ótti.

«Biz Qazaqstan men Iran arasyndaǵy AÓK ónimderiniń ınvestıtsııalyq kórsetkishteri men taýar aınalymyn arttyrýǵa umtylýdamyz. Sondaı-aq biz elimizdiń aýmaǵynda jobalardy iske asyrýǵa múddeli ırandyq ınvestorlarǵa qajetti qoldaý kórsetýge daıynbyz. 2022 jyly biz Iranǵa rekordtyq 1 mln tonna astyq eksporttadyq. Sizdermen basqa da mańyzdy baǵyttarda jumys istegimiz keledi» , - dedi vıtse-mınıstr.

Kezdesýde taraptardyń ózara is-qımyly úshin negiz bola alatyn negizgi salalar aıqyndaldy. Olardyń ishinde azyq-túlik óndirisi, ósimdik sharýashylyǵy bar.

Álı Akbar Djoýkar Qazaqstan-Iran qarym-qatynastaryn odan ári damytýdyń mańyzdylyǵyn atap ótip, Qazaqstannyń balyq ónerkásibine qyzyǵýshylyq tanytty.

Kezdesýge qatysýshylar belsendi baılanys ornatýǵa jáne barlyq ózara tıimdi bastamalardy talqylaýǵa daıyn ekendikterin rastady.

Kezdesý sońynda Ermek Kenjehanuly Iran elshisi men áleýetti ınvestorlardy qazan aıynda Astanada ótetin «KazAgro & KazFarm» halyqaralyq kórmesine qatysýǵa shaqyrdy.