Qazaqstan men Germanııa ýnıversıtetteri birqatar kelisimge qol qoıdy

ASTANA. QazAqparat - Memleket basshysy mundaı kezdesýler ózara tájirıbe almasyp, tıimdi baılanystar ornatýǵa múmkindik beretinin atap ótti. Sondaı-aq qol jetken ýaǵdalastyqtar eki eldiń ǵylymı áleýetin arttyrýǵa septigin tıgizetinine senim bildirdi, dep habarlaıdy Aqorda.

– Germanııanyń bedeldi ǵalymdarynan quralǵan delegatsııany elimizge alyp kelgeni úshin áriptesim Prezıdent Shtaınmaıerge rızashylyǵymdy bildiremin. Birlesken jumysty tabysty atqarý úshin qajetti jaǵdaıdyń bárin jasaımyz. Bizdiń yntymaqtastyǵymyz, dostyǵymyz jáne bir-birimizge tileýlestik nıetimiz tabysty bolaryna senimdimin, – dedi Qasym-Jomart Toqaev.

Sondaı-aq rektorlar forýmynda Germanııa Prezıdenti Frank-Valter Shtaınmaıer sóz sóıledi.

Ol eki eldiń joǵary bilim berý, ǵylymı zertteý jáne stýdentterdi oqytý isindegi yntymaqtastyqtyń mańyzdy ekenin atap ótti.

Jıyn aıasynda Qazaqstan men Germanııanyń joǵary oqý oryndary arasynda birqatar kelisimge qol qoıyldy.

Jalpy, rektorlar forýmyna 11 germanııalyq jáne 25 qazaqstandyq tehnıkalyq ýnıversıtettiń ókilderi qatysty.