Qazaqstan men Frantsııa arasynda Áblıazovty ekstradıtsııalaý týraly kelisim jasalmaǵan - SІM

ASTANA. QazAqparat – Muhtar Áblıazovti Qazaqstanǵa ekstradıtsııalaý saıası deńgeıde talqylanbaıdy. QR Syrtqy ister vıtse-mınıstri Roman Vasılenko Prezıdenttiń Frantsııaǵa sapary týraly suraqtarǵa bergen jaýabynda osyndaı málimet aıtty, dep habarlaıdy QazAqparat tilshisi.

«Áblıazov myrzaǵa keletin bolsaq, bul - kóptegen elderdiń quqyq qorǵaý organdarynyń nazaryndaǵy másele. Bul másele saıası deńgeıde talqylanbaıdy. Tek Qazaqstannyń ǵana emes, basqa da elderdiń, sonyń ishinde Eýropa men AQSh-tyń sot jáne quqyq qorǵaý organdarynyń baqylaýynda tur. Áblıazov myrza Qazaqstandaǵy quqyq buzý faktileri úshin 20 jylǵa sottalǵany belgili. Sonymen qatar, ony Londonnyń joǵarǵy soty «BTA» bankinen shamamen 4 mıllıard dollar urlady dep aıyptady», - dedi vıtse-mınıstr Májilis kýlýarynda.

Onyń málimeti boıynsha, qazir Muhtar Áblıazovtiń ústinen basqa da sot protsesteri júrip jatyr.

«Meniń bilýimshe, AQSh-ta, Ulybrıtanııa men Frantsııada osyndaı ister bar. Sonymen qatar, «BTA» banki de, Almaty ákimdigi de, QR Ádilet mınıstrligi de Qazaqstan jaǵynan osy protseske qatysýshy tarap bolyp otyr. Sondyqtan bul másele taza quqyqtyq keńistikte qaralady. Ol Áblıazov myrzaǵa qatysty ister tergelip jatqan elderdiń quqyq qorǵaý organdarynyń ózara is-qımylynyń quzyreti bolyp esepteledi. Saıası deńgeıde mundaı máseleler talqylanbaıdy. Bul - sot jáne quqyq qorǵaý organdarynyń quzyreti», - dedi Roman Vasılenko.

«Ekstradıtsııalaý josparda bar ma?» dep surady BAQ ókilderi.

«Qazaqstan men Frantsııa arasynda qazirgi ýaqytta ekstradıtsııalaý týraly kelisim jasalmaǵan. Bul másele frantsýz tarapymen odan ári talqylanady. Meniń bilýimshe, qazir Frantsııada Áblıazov myrzaǵa qatysty sot protsesi júrip jatyr», - dedi Syrtqy ister mınıstriniń orynbasary.

Eske sala keteıik, biz buǵan deıin Muhtar Ábilıazovtiń halyqaralyq izdestirýde júrgen sybaılasy Qazaqstanǵa ákelingenin habarlaǵan edik.