Qazaqstan men Fortescue kompanııasy «jasyl» sýtegi óndirý jónindegi kelisimge qol qoıdy

KAIR. QazAqparat - Qazaqstan Úkimeti men Fortescue Future Industries kompanııasy elimizdiń birneshe óńirinde, sonyń ishinde Atyraý jáne Mańǵystaý oblystarynda «jasyl» sýtegi óndirý jónindegi jobalardy iske asyrý jóninde negizdemelik kelisim jasasty, dep habarlaıdy primeminister.kz.

Qujatqa Mysyrda ótip jatqan Klımattyń ózgerýi jónindegi jahandyq konferentsııanyń (COP27) Álemdik kóshbasshylar sammıti aıasynda QR Premer-Mınıstri Álıhan Smaıylov pen Fortescue kompanııasynyń basshysy Endrıý Forrest qol qoıdy.

Kelisimdi iske asyrý elimizdiń 2030 jylǵa qaraı parnıktik gaz shyǵaryndylaryn 15%-ǵa azaıtý jáne 2060 jylǵa qaraı kómirtegi beıtaraptyǵyn qamtamasyz etý boıynsha bıik maqsattarǵa qol jetkizýine úles qosady dep kútilip otyr.

Aldaǵy jobalar keshe Qazaqstan men Eýroodaq arasynda qol qoıylǵan ózara túsinistik týraly memorandým aıasynda eýropalyq naryqqa jetkizý josparlanyp otyrǵan «jasyl» sýteginiń aýqymdy kólemin óndirýge arnalǵan.

Jalpy alǵanda, «taza» sýtegin óndirýdiń qoljetimdi tehnologııalaryn engizý Qazaqstanǵa 5-7 jyldan keıin osy otynnyń álemdik iri jetkizýshileriniń birine aınalýyna múmkindik beredi.

Álıhan Smaıylov «jasyl» sýtegin óndirý jobasy óńirdegi osyndaı iri jobalardyń biri ekenin atap ótti.

«Balamaly energııa kózderin damytý sheńberinde»jasyl« sýtegin óndirý biz úshin mańyzdy jáne basym baǵyttardyń biri bolyp tabylady. Halyqaralyq sarapshylardyń baǵalaýynsha, Qazaqstan osy ekologııalyq taza otyn túriniń 10 iri eksporttaýshysynyń qataryna kire alady. Osy maqsatqa jetý úshin bizge strategııalyq seriktesterimizdiń qoldaýy mańyzdy», — dedi Álıhan Smaıylov.

Ol QR Úkimeti «jasyl» energetıka sektoryndaǵy jeke kompanııalardyń úlesin arttyrý úshin ınvestıtsııalar tartý júıesin qaıta qaraǵanyn atap ótti.

«Bizdiń dekarbonızatsııany yntalandyrý tásilimiz naryqtyq tetikter men jeke ınvestıtsııalardy barynsha paıdalanýǵa negizdeledi», — dedi Premer-Mınıstr.

Óz kezeginde Endrıý Forrest «jasyl» sýtegin óndirý jáne qoldaný aýyr ónerkásipti dekarbonızatsııalaýǵa, jumys oryndaryn qurýǵa jáne jalpy energetıka salasynyń turaqtylyǵyn arttyrýǵa septigin tıgizetinin atap ótti.

«Biz osy áleýetti tezirek iske asyrýǵa kómektesý úshin jumys tásilderimiz ben múmkindikterimizdi Qazaqstanmen qýana bólisemiz», — dedi Endrıý Forrest.

Foto:t.me/KZgovernment