Qazaqstan men Fınlıandııa tıimdiligi joǵary jobalardy birlesip atqarmaq

HELЬSINKI. QazAqparat - Qazaqstannyń mashına jasaýshylar odaǵy men Fın salalyq tehnologııalar federatsııasy arasynda ózara is-qımyl jáne yntymaqtastyq týraly memorandýmǵa qol qoıyldy. Qujat Qazaqstan Prezıdenti Nursultan Nazarbaevtyń Fınlıandııaǵa resmı sapary aıasynda rásimdeldi, dep habarlaıdy QazAqparattyń arnaýly tilshisi Helsınkıden.

Eki eldiń mashına jasaý salasyndaǵy iskerlik yntymaqtastyǵyn nyǵaıtý jáne  qatynastardy keńeıtýge baǵyttalǵan qujatqa Qazaqstannyń mashına jasaýshylar odaǵynyń basqarma tóraǵasy, Májilis depýtaty Meıram Pishembaev pen Fın salalyq tehnologııalar federatsııasynyń basqarma tóraǵasy, «Nokıa» kompanııasy Dırektorlar keńesiniń tóraǵasy Rısto Sıılasmaa qol qoıdy.

«Kelisim elderimiz arasyndaǵy bıznes jobalardy damytýǵa tyń serpin berip, qazaqstandyq kásipkerler úshin fın bıznesmenderimen «bir tereze» arqyly baılanys ornatýǵa múmkinshilik ashady. Biz úshin munaı-gaz, taý-ken, mashına jasaý, aýyl sharýashylyǵy syndy salalardaǵy ımport taýarlardy almastyrýǵa múmkindik beretin fın jobalaryn alý barynsha paıda ákeledi. Fın kásiporyndary shyǵaratyn ónimder negizinen eksportqa baǵyttalǵan. Biz de ımportqa táýeldilikten arylýǵa múmkindik beretin jobalardy júzege asyrýǵa  den qoıyp otyrmyz. Sondyqtan bul kelisimniń elimiz úshin mańyzdy bolary sózsiz», - dedi Meıram Pishembaev.

Aıta keteıik, memorandým bıznestiń jańa uzaq merzimdi ózara tıimdi seriktestik qatynastardy ornatýǵa, sonymen qatar Fınlıandııa jáne Qazaqstannyń mashına jasaý jáne aralas ónerkásip salasyndaǵy kásiporyndar men kásipkerlermen birigip júzege asyrylatyn tıimdiligi joǵary ınnovatsııalyq jobalardy iske asyrýǵa jaǵdaı jasaıtyn bolady.