Qazaqstan men Eýropalyq Odaq halyqaralyq kólik dálizderin damytý máselesin talqylady
«Qazirgi tańda Eýropalyq Odaqtyń Qazaqstanǵa tikeleı sheteldik ınvestıtsııasynyń jalpy kólemi 160 mlrd dollardy qurap, elimizdiń eń iri saýda jáne ınvestıtsııalyq seriktesi bolyp otyr. Tek osy jyly (sońǵy 9 aıda) Qazaqstan men EO elderi arasyndaǵy saýda kólemi 42 paıyzǵa ulǵaıyp, 30 mlrd dollardy qurady. Ótken aıda Qazaqstannyń Úkimeti jáne iri eýropalyq Svevind kompanııasy arasynda Mańǵystaý oblysynda «jasyl» sýtekti óndirý jáne taratý ortalyǵyn qurý jóninde mańyzdy kelisimge qol qoıyldy», - dedi M. Tileýberdi.
Sonymen qatar mınıstr Jozep Borrelmen kelissóz barysynda Eýropalyq Odaq sanktsııalarynyń Qazaqstan ekonomıkasyna janama teris áserin boldyrmaý máselesine erekshe nazar aýdarylǵanyn atap ótti.
«Biz aýyl sharýashylyǵy, tsıfrlandyrý, kólik pen logıstıka jáne basqa da salalardaǵy yntymaqtastyqty tereńdetýge, «jasyl» ekonomıkaǵa kóshýge, energııa tıimdiligin arttyrýǵa nazar aýdara otyryp, saýda-ekonomıkalyq saladaǵy qarym-qatynasty odan ári ártaraptandyrýǵa múddelimiz. Biz osy jáne basqa máselelerdi tek ekijaqty baǵytta ǵana emes, óńirlik formatta da qarastyrýdy mańyzdy dep sanaımyz. Elimiz Ortalyq Azııa jáne Eýroodaq arasyndaǵy yntymaqtastyqty damytýǵa erekshe kóńil bólip otyr. Osy sebepten Memleket basshysy Astanada Ortalyq Azııa–Eýroodaq kóshbasshylarynyń alǵashqy kezdesýin ótkizýge bastamashylyq etip, onyń qorytyndysy boıynsha barlyq taraptar osyndaı is-sharalardy turaqty negizde ótkizý týraly sheshim qabyldady», - dedi QR Syrtqy ister mınıstri.
M. Tileýberdi J. Borrelmen kelissóz barysynda qazirgi geosaıası jaǵdaıdy eskere otyryp, taýarlardy jetkizýdiń jahandyq tizbegin qamtamasyz etý úshin halyqaralyq kólik dálizderin damytýdyń mańyzdylyǵy talqylanǵanyn jetkizdi.
«Sonyń ishinde Eýropalyq Odaqtyń «Transkaspıı halyqaralyq kólik baǵytyn» damytýdy qoldaý joldaryn talqyladyq. Sonymen qatar, ózekti óńirlik jáne halyqaralyq máseleler boıynsha pikir almasý boldy. Bul rette, Ýkraınadaǵy qaqtyǵysty, Sırııadaǵy, Aýǵanstandaǵy jaǵdaıdy, sondaı-aq Ortalyq Azııa óńirindegi klımattyń ózgerýi, qaýipsizdik jáne ornyqty damý máselelerin qosa alǵanda, álemdegi qazirgi ahýal talqylandy. Qorytyndylaı kele, Joǵary mártebeli Borrell myrzaǵa birlesken jemisti jumys pen ashyq dıalog úshin alǵys aıtqym keledi», - dedi QR Syrtqy ister mınıstri.
Eske salsaq, Eýropalyq Odaqtyń Syrtqy ister jáne qaýipsizdik saıasaty jónindegi Joǵarǵy ókili Jozep Borrel Qazaqstanǵa sapary qarsańynda QazAqparattyń menshikti tilshisine eksklıýzıv suhbat berdi.