Qazaqstan men Eýropalyq Odaq ekijaqty jáne óńirlik formattaǵy yntymaqtastyqty nyǵaıtýda

ASTANA. QazAqparat - Qazaqstan Respýblıkasy Syrtqy ister mınıstriniń orynbasary Roman Vasılenkonyń Syrtqy ister komıtetiniń (AFET) tóraǵasy Devıd Makallıster (Germanııa) bastaǵan Eýropalyq Parlamenttiń (EP) delegatsııasymen kezdesýi Qazaqstan men Eýropalyq Odaq arasyndaǵy ekijaqty jáne óńirlik áriptestikti nyǵaıtýdaǵy jańa qadam boldy.

Bul týraly QazAqparat QR Syrtqy ister mınıstrliginiń baspasóz qyzmetine silteme jasap habarlaıdy.

QR SІM ǵımaratynda ótken is-sharada AFET komıteti tóraǵasynyń orynbasary Jelıana Zovko (Horvatııa), eýrodepýtattar George-Vlad Nıstor (Rýmynııa), Klemen Groshel (Slovenııa), Karsten Lıýke (Germanııa), ıÝozas Olekas (Lıtva), Manolıs Kefaloıannıs (Grekııa) jáne Eýroparlamenttiń birqatar jetekshi partııalyq toptarynyń saıası keńesshileri qatysty.

Taraptar Qazaqstan men Eýroodaq arasyndaǵy Keńeıtilgen áriptestik pen yntymaqtastyq týraly kelisim sheńberindegi ekijaqty saıası jáne saýda-ekonomıkalyq salalardaǵy yntymaqtastyqtyń basym baǵyttaryn, sondaı-aq kólik jáne logıstıka, energetıka salalaryndaǵy ózara árekettesýin, onyń ishinde Orta dálizdiń damýyn talqylady. Sonymen qatar asa mańyzdy shıkizat materıaldar jáne «jasyl» sýtegi sııaqty jańa perspektıvalyq taýashalar talqylandy.

Mınıstrdiń orynbasary Qazaqstannyń Eýropalyq Odaqpen jaqyndasýyna yqpal etetin elimizdiń azamattary úshin vızalyq rejımdi jeńildetý týraly resmı konsýltatsııalardy eń jaqyn arada bastaýdyń mańyzdylyǵyn atap ótti.

Taraptar parlamentaralyq qatynastar damýynyń oń dınamıkasyna da qanaǵattanýshylyq tanytty. «Eýroparlament Qazaqstan men Eýroodaq arasyndaǵy ózara is-qımyldyń keń aýqymyn damytýda asa mańyzdy ról atqara alady, sonymen qatar Ortalyq Azııadaǵy óńirlik yntymaqtastyqty damytý jónindegi bizdiń kúsh-jigerimizdi qoldaı alady», – dep atap ótti R.Vasılenko.

Óz tarapynan D.Makallıster QR men EO arasyndaǵy saıası dıalogtyń jaı-kúıine joǵary baǵa berip, ekijaqty jáne óńirlik yntymaqtastyqtyń basym baǵyttary boıynsha taraptar arasyndaǵy turaqty jáne qarqyndy ózara is-qımyldy quptady.

«Qazaqstan Eýroodaqtyń Azııaǵa jol asha alatyn óńirdegi senimdi ári turaqty seriktesi. Ortalyq Azııa Eýropa úshin mańyzdy. Al Eýropa Ortalyq Azııa úshin mańyzdy», – dedi eýropalyq saıasatker.

Sonymen qatar, ózekti óńirlik jáne halyqaralyq syn-qaterler, onyń ishinde Aýǵanstandaǵy jaǵdaı boıynsha pikir almasý ótti.

Anyqtama: Eýropalyq odaq Qazaqstannyń negizgi saýda jáne ınvestıtsııalyq seriktesi bolyp tabylady. Qazaqstandyq syrtqy saýda men sheteldik ınvestıtsııalardyń 30%-dan astamy EO úlesine jatady.

2022 jyldyń qorytyndysy boıynsha taraptar arasyndaǵy taýar aınalymy 39,9 mlrd AQSh dollar qurady, bul ótken jylǵy kórsetkishten 38%-ǵa joǵary. Aǵymdaǵy jyly 6 aıdyń ishinde saýda kólemi 0,3%-ǵa ulǵaıyp, 20 mlrd AQSh dollarynan asty.

2022 jyly Eýroodaqtan Qazaqstan ekonomıkasyna tikeleı ınvestıtsııalar kólemi 23%-ǵa ósip, 12,5 mıllıard AQSh dollarǵa jetti, bul sońǵy 10 jyldaǵy rekordtyq kórsetkish boldy.