Qazaqstan men Eýroodaq elderi arasyndaǵy taýar aınalymy 51% ósti

NUR-SULTAN. QazAqparat - QR Premer-Mınıstri Álıhan Smaıylov «Qazaqstan-Eýroodaq» dıalog platformasynyń otyrysyn ótkizdi, dep habarlaıdy primeminister.kz.

Sharaǵa Eýropalyq odaqtyń Qazaqstandaǵy ókildiginiń basshysy, Germanııa, Frantsııa, Ispanııa, Lıtva, Polsha, Belgııa, Shvetsııa, Slovakııa, Estonııa, Horvatııa, Nıderland, Bolgarııa, Chehııa, Latvııa, Fınlıandııa, Italııa, Aýstrııa, Grekııa jáne Rýmynııanyń elimizdegi elshileri, sondaı-aq ortalyq memlekettik organdar men ulttyq kompanııalardyń basshylary qatysty.

Otyrys basynda QR Premer-Mınıstri Eýropalyq Odaq kóp jyldar boıy Qazaqstannyń negizgi saıası, saýda-ekonomıkalyq jáne ınvestıtsııalyq seriktesteriniń biri ekenin atap ótti.

Máselen, Qazaqstan men EO elderi arasyndaǵy taýar aınalymy 2022 jyldyń 6 aıynda $20,1 mlrd qurady. Bul 2021 jyldyń sáıkes kezeńimen salystyrǵanda 51,2%-ǵa kóp.

1-toqsannyń qorytyndysy boıynsha jalpy sheteldik ınvestıtsııalardyń elge kelýi 54%-ǵa artyp, $6,8 mlrd qurady.

Bul oraıda taý-ken óndirý ónerkásibine kapıtal tartý deńgeıi 35,7%-ǵa ósip, $3,5 mlrd qurady.

«Biz Eýroodaqtyń Qazaqstannyń taý-ken ónerkásibine qyzyǵýshylyq tanytyp otyrǵanyn kórip otyrmyz. Osy saladaǵy yntymaqtastyqtyń áleýeti zor. Osyǵan baılanysty Eýropalyq Odaq elderiniń geologııalyq qyzmetterin tsıfrlandyrý, geologııa ǵylymyn damytý jáne salalyq ınfraqurylym salasynda seriktes bolýǵa shaqyramyz», - dedi Álıhan Smaıylov.

Premer-Mınıstr salany avtomattandyrý aıasynda jer qoınaýyn paıdalaný salasyndaǵy barlyq qoldanystaǵy aqparattyq júıelerdi biriktirý jáne ıntegratsııalaý arqyly Kaznedra biryńǵaı platformasy qurylatynyn atap ótti.

Bul platforma ınvestorlarǵa «bir tereze» rejıminde keshendi servıstik qyzmet kórsetýge yqpal etetin bolady.

Sonymen qatar Úkimet basshysy geologııalyq barlaý jumystarynyń dástúrli túrlerimen qatar, Qazaqstandy geofızıkalyq zertteýlerdiń ozyq ádisteri qyzyqtyratynyn atap ótti.

«Osy múmkindikti paıdalana otyryp, Qazaqstannyń Eýroodaq elderimen ekonomıkalyq yntymaqtastyqty keńeıtý jáne nyǵaıtý jónindegi nıetiniń naqty ekenin taǵy da rastaǵym keledi», - dedi Álıhan Smaıylov.

Otyrys barysynda qatysýshylar paıdaly qazbalardy óndirý, jańa tehnologııalardy qoldaný, geologııalyq derekterdi tsıfrlandyrý, ınvestıtsııalar tartý, ónerkásip qaldyqtaryn qaıta óńdeý jáne qorshaǵan ortany qorǵaý máselelerin talqylady.

Foto: primeminister.kz