Qazaqstan men Eýroodaq arasyndaǵy saýda aınalymy bes aıda 20,2 mlrd dollarǵa jetti
«Eýropalyq Odaq – Qazaqstannyń eń iri saýda jáne ınvestıtsııalyq seriktesteriniń biri. Bıyl 5 aıdyń ishinde ózara saýda 20,2 mlrd dollarǵa jetti. Bul kórsetkish elimizdiń jalpy saýda aınalymynyń 37%-yn quraıdy. 2023 jylǵa kelsek, alys-berisimiz 41 mlrd dollardan asyp tústi. Byltyr Eýroodaq elderinen Qazaqstan ekonomıkasyna 10,4 mlrd dollar ınvestıtsııa tartyldy. Al, 2005 jyldan beri quıylǵan ınvestıtsııalar kólemi 180 mlrd dollardan asty», - dedi Murat Nurtileý Eýropalyq Odaqtyń Syrtqy ister jáne qaýipsizdik saıasaty jónindegi Joǵarǵy ókilimen kezdesýden keıin BAQ ókilderi aldynda.
Onyń sózinshe, búginde elimizde 3 myńnan astam eýropalyq kompanııa ekonomıkanyń túrli sektorynda belsendi jumys istep jatyr.
«Olardyń ishinde «Eni», «Total», «Amazonen-Werke», «Air Liquide», «Alstom», «Carlsberg» sııaqty aty álemge tanymal kompanııalar bar. Jalpy, bizdiń dástúrli basymdyqtarymyz energetıka, kólik pen logıstıka, aýyl sharýashylyǵy, mashına jasaý men óndiris, aqparattyq tehnologııalar bolǵan. Bul joly biz CRM, ıaǵnı asa mańyzdy shıkizat materıaldar boıynsha yntymaqtastyqty damytý máselesine kóńil bóldik», - deıdi ol.
Sondaı-aq, vedomstvo basshysy Qazaqstan Úkimeti eýropalyq kompanııalar men iskerlik toptardyń elimizge kelýin quptaıtyndyǵyn jetkizdi.
Buǵan deıin habarlaǵanymyzdaı, Astanaǵa Eýropalyq Odaqtyń Syrtqy ister jáne qaýipsizdik saıasaty jónindegi Joǵarǵy ókili, Eýrokomıssııanyń Vıtse-prezıdenti Jozep Borrell resmı saparmen keldi.
Buǵan deıin, QR Premer-Mınıstriniń orynbasary – Syrtqy ister mınıstri Murat Nurtileý Eýropalyq Odaqtyń Syrtqy ister jáne qaýipsizdik saıasaty jónindegi Joǵarǵy ókili Jozep Borrelmen kelissózder júrgizgenin jazǵan bolatynbyz.