Qazaqstan men EO: koronavırýspen kúres taýar aǵynyna kedergi keltirmeýi tıis
Mınıstrdiń jumys sapary Qazaqstan Respýblıkasynyń Prezıdenti Qasym-Jomart Toqaevtyń Eýropalyq Odaqqa alǵashqy resmı saparyn daıyndaý jáne Memleket basshysynyń qarasha aıynyń sońynda Qazaqstannyń tóraǵalyǵymen ótetin Dúnıejúzilik saýda uıymynyń 12-shi Mınıstrlik konferentsııasynyń ashylý rásimine qatysýy sheńberinde ótýde.
Osylaısha, mınıstr Sultanov Eýropalyq saýda jáne ekonomıka jónindegi komıssııanyń Atqarýshy Vıtse-prezıdenti Valdıs Dombrovskıspen kezdesti.
Kezdesýde Qazaqstan men Eýropalyq Odaqtyń ekijaqty saýda-ekonomıkalyq qatynastary máseleleri kóterildi.
EO negizgi saýda jáne ınvestıtsııalyq áriptes bolyp tabylady, onyń úlesine qazaqstandyq syrtqy saýda aınalymynyń jáne elimizdiń ekonomıkasyna ınvestıtsııalardyń jartysyna jýyǵy tıesili. Bul rette bizdiń elimiz «ekinshi býyn» qujatyna - Qazaqstan men EO arasyndaǵy Keńeıtilgen áriptestik pen yntymaqtastyq týraly kelisimge (KÁYK) qol qoıǵan Ortalyq Azııadaǵy birinshi memleket boldy. Kezdesýge qatysýshylar osy baǵdarlamalyq qujat sheńberindegi ıntegratsııalyq protsester QR men EO yntymaqtastyǵynyń aýqymyn keńeıtýge múmkindik beretinine senim bildirdi.
Kezdesý taqyryptarynyń biri qazaqstandyq aýyl sharýashylyǵy ónimderin eksporttaý kezinde eýropa elderiniń ruqsat qujattaryn alý rásimderin jeńildetý máseleleri boldy.
Baqyt Sultanov pen Valdıs Dombrovskıs 12-shi mınıstrlik konferentsııasyna daıyndyq barysyn talqylady.
- Mınıstrlik konferentsııasynyń kún tártibindegi máseleler boıynsha konsensýsqa qol jetkizýde birlesken kúsh-jiger qajet. Bul kópjaqty saýda júıesi retinde DSU-ǵa degen senimdi qalpyna keltirý úshin oń sıgnal bolady. MK-12 sheshimderi DSU - ny oń traektorııaǵa shyǵarý úshin sheshýshi mánge ıe bolady, - dep atap ótti Baqyt Sultanov.
Eýrokomıssııanyń Vıtse-prezıdenti yntymaqtastyqty tereńdetýdiń mańyzdylyǵyn jáne KÁYK sheńberinde quraldar men konsýltatsııalardyń neǵurlym keń jáne tıimdi sheńberin qoldaný qajettiligin atap ótti.
Valdıs Dombrovskıs Qazaqstannyń óńirdegi jetekshi rólin, sondaı-aq Eýropalyq Odaqtyń aldaǵy DSU MK-12 sheńberinde ońtaıly sheshimder men konsensýstardy izdeýge beıildiligin atap ótti.
Sol kúni Saýda jáne ıntegratsııa mınıstri Eýropalyq Parlamenttiń Halyqaralyq Saýda Komıtetiniń tóraǵasy Bernd Lange jáne Eýroparlament depýtaty Ryshard Charnetskıımen kezdesti.
Júzdesý barysynda Qazaqstan men Eýropalyq Odaq arasyndaǵy yntymaqtastyqty keńeıtý joldary men múmkindikteri talqylandy.
Lange myrza kovıdokrızısten bolatyn shyǵyndardy azaıtý úshin barlyq elderdiń kooperatsııasy qajettiligi týraly Qazaqstannyń ustanymyn qoldady. Eýroparlament ókilderi koronovırýsqa qarsy kúres halyqaralyq taýar aǵyndaryna kedergi keltirmeýi tıis ekenin atap ótti.
Eýropalyq Parlamenttiń dostyq tobynyń tóraǵasy Ryshard Charnetskıı Baqyt Sultanovty qarsy ala otyryp, Eýropalyq Parlamenttegi QR-EO dostyq tobynyń Qazaqstan Respýblıkasy men Eýropalyq Odaq arasyndaǵy dıalogty nyǵaıtýǵa jáne yntymaqtastyqty damytýǵa yqpal etetinin atap ótti.
Sapar barysynda Mınıstr, sondaı-aq «Tessenderlo Group» Bas dırektory Lıýk Takommen kelissózder júrgizdi.
Qazaqstanda ınvestıtsııalyq jobalardy iske asyrý múmkindigi talqylandy. Onyń ishinde ındýstrııalyq saýda-logıstıkalyq habtar aýmaǵynda.
«TessenderloGroup» - aýyl sharýashylyǵyna jáne bıologııalyq qaldyqtardyń qundylyǵyn arttyrýǵa mamandandyrylǵan iri ónerkásiptik top. Toptyń qyzmet etý salasyna qorektik zattar men ósimdikterdi qorǵaý quraldaryn óndirý, janýarlardan alynatyn janama ónimderdi qaıta óńdeý jatady. Kompanııa - joǵary sapaly kollagen jelatıni men peptıdterin álemdik jetekshi óndirýshilerdiń biri.
Kompanııa qazaqstandyq tarappen osy baǵytta yntymaqtastyqqa múddelilik tanytty.
Sonymen qatar, kezdesýge krandardy jalǵa berý, aýyr júkterdi kóterý jáne ınjenerlik kólik qyzmetteri salasynda álemdik kóshbasshy jáne etalon bolyp tabylatyn Sarens Group Basqarma Tóraǵasy Vım Sarepns qatysty. Sarens Group-tyń Atyraý men Qaraǵandyda 2 keńsesi bar.