Qazaqstan men Dúnıejúzilik etnosport konfederatsııasy mádenı murany saqtaýda kúsh biriktirmek

<p>ASTANA. KAZINFORM - Týrızm jáne sport mınıstri Erbol Myrzabosynov 5-shi Dúnıejúzilik kóshpendiler oıyndary aıasynda Dúnıejúzilik etnosport konfederatsııasynyń prezıdenti Bilál Erdoǵanmen kezdesti.&nbsp;</p>

Kezdesý barysynda Erbol Myrzabosynov kóshpendiler oıyndarynyń etnosport qozǵalysyn damytýda jáne tarıhı mádenı murany saqtaýda mańyzy zor ekenin atap ótti. Sonymen qatar mınıstr Dúnıejúzilik etnosport konfederatsııasy mádenı jáne zamanaýı sporttyq baǵdarlamalarǵa biriktirýge yqpal etetin etnosport is-sharalaryn ótkizý jónindegi bastamalardy qoldaıtynyn jetkizdi.

«Dúnıejúzilik kóshpendiler oıyndary – túrki áleminiń mańyzdy sporttyq oqıǵasy. Óıtkeni bul báseke sportshylardyń jyldar boıǵy qajyrly eńbeginiń jemisin kórsetedi. Etnosport konfederatsııasynyń basty mindetteriniń biri – álem halyqtarynyń dástúrli sport túrlerin jańǵyrtý jáne nasıhattaý», - dedi mınıstr.

Taraptar etnosport is-sharalaryn uıymdastyrý salasyndaǵy odan ári yntymaqtastyq pen tájirıbe almasý áleýetin, sondaı-aq jastar arasynda etnıkalyq sport túrlerin tanymal etýge baǵyttalǵan birlesken jobalardy damytýdy talqylady.

Kezdesý sońynda mınıstr Erdoǵanǵa sapary úshin alǵys aıtyp, Qazaqstan men Dúnıejúzilik etnosport Konfederatsııasy arasyndaǵy tyǵyz yntymaqtastyq etnıkalyq sportty odan ári damytý, mádenı baılanystardy nyǵaıtý jáne bolashaq urpaq úshin tarıhı murany saqtaý úshin berik negiz bolatynyn aıtty.