Qazaqstan men Bolgarııa sottalǵandardy berý týraly kelisimge keldi

SOFIıA. QazAqparat - Búgin Sofııa (Bolgarııa) qalasyna jumys sapary barysynda QR Bas prokýrory Ǵızat Nurdáýletov Bolgarııanyń Bas prokýrory Sotır Tsatsarov pen Ádilet mınıstri Danaıl Kırılovpen kezdesti, dep habarlaıdy QazAqparat.

Bas prokýratýra baspasóz qyzmetiniń málimetinshe, eki eldiń prokýrorlary ekijaqty quqyqtyq yntymaqtastyqty odan ári nyǵaıtý jáne qylmystyqqa qarsy kúreste birlesip kúsh salý qajettiligin talqylaǵan.

Bas prokýror Ǵızat Nurdaýletov pen Bolgarııanyń Ádilet mınıstri Danaıl Kırılov Qazaqstan men Bolgarııanyń Sottalǵan tulǵalardy berý jónindegi kelisimine qol qoıdy.

«Mundaı túrdegi halyqaralyq kelisimder jasasý Qazaqstan Konstıtýtsııasynyń 11-babynyń talaptaryna negizdelgen, oǵan sáıkes memleket óz azamattaryn odan tys jerlerde qorǵaýǵa jáne olarǵa qamqorlyq jasaýǵa kepildik beredi», delingen habarlamada.

Esterińizge sala keteıik, 2014 jyldyń qarasha aıynda Qazaqstan bolgar tarapymen qylmystyq ister boıynsha ózara quqyqtyq kómek kórsetý jáne adamdardy ustap berý týraly shart jasasqan bolatyn.

Bolgarııa Qazaqstanmen birlesip qylmysqa qarsy kúres, zańdylyq pen quqyqtyq tártipti qamtamasyz etý, sondaı-aq azamattardyń negizgi quqyqtary men múddelerin qorǵaý salasyndaǵy yntymaqtastyq úshin barlyq qajetti halyqaralyq-quqyqtyq baza qurǵan kezekti eýropalyq memleket bolǵanyn atap ótý kerek.