Qazaqstan men Belarýs Syrtqy ister mınıstrleri qandaı ýaǵdalastyq ornatty

MINSK. QazAqparat – Belarýs astanasynda QR Premer-Mınıstriniń orynbasary – QR Syrtqy ister mınıstri Murat Nurtileý men Belarýs syrtqy saıası vedomstvosynyń basshysy Sergeı Aleınık arasynda kelissózder júrgizildi, dep habarlaıdy QazAqparat tilshisi.

«Búgin jemisti kelissózder ótti, onda biz Qazaqstan-Belarýs yntymaqtastyǵynyń jaı-kúıi men túrli salalardaǵy damý perspektıvalaryn egjeı-tegjeıli talqyladyq. Qos eldiń qarym-qatynasy dostyq pen ózara qurmette qarqyndy damýyn jalǵastyrýda. Kún tártibindegi barlyq máseleler boıynsha biz ózara túsinistik taýyp, olardy ári qaraı ilgeriletý joldaryn ázirledik», - dedi ol kezdesýden keıin tilshilerge bergen suhbatynda.

Sergeı Aleınık atap ótkendeı, búginde qos tarap Qazaqstanda ózin jaqsy tanytqan Belarýs aýyl sharýashylyǵy jáne avtomobıl tehnıkasyn jetkizýdi ulǵaıtý múmkindikterine nazar aýdardy. Belarýs órt sóndirý mashınalaryn birlesip óndirýge daıyn ekenin bildirdi. Sondaı-aq, taraptar eki eldiń óńirleri arasynda jemisti ekonomıkalyq baılanystar qurýdy jandandyrý jáne parlamentarııler arasyndaǵy belsendi baılanystarǵa járdemdesý joldaryn tabýǵa ýaǵdalasty. Sonymen qatar, Belarýste qazaqstandyq bilim kúnderin ótkizý josparlanýda.

Eki eldiń SІM basshylary halyqaralyq qatynastar memleketterdiń ishki isterine aralasýdan jáne halyqaralyq quqyqtyń negizgi qaǵıdattaryna qaıshy keletin zańsyz sanktsııalyq qysymnan bosatylýy kerektigin basa aıtty.

«Eki el de ózara saýdadaǵy kedergiler men shekteýlerdi alyp tastaýdy, «tórt» bostandyqty – EAEO keńistiginde taýarlardyń, kórsetiletin qyzmetterdiń, kapıtal men jumys kúshiniń kedergisiz qozǵalysyn tolyq formatta qamtamasyz etýdi qalaıdy. Biz Belarýs jáne Qazaqstan taraptary halyqaralyq uıymdar – BUU, EQYU, ShYU, AÓSShK alańdarynda tyǵyz ózara is-qımyl jasap, bir-birine qoldaý kórsetýdi jalǵastyratynyna ýaǵdalastyq», - dedi Belarýs Syrtqy ister mınıstri.

Sergeı Aleınık baspana qurylysynyń sımmetrııaly jobalary – Astanadaǵy «Belarýs oramy» jáne Mınskidegi «Qazaqstan oramy» boıynsha jol kartasyna qol qoıylǵanyn aıtty.

«Biz Qazaqstannyń Belarýstiń Shanhaı Yntymaqtastyq Uıymyna qosylý protsesinde kórsetken qoldaýyn joǵary baǵalaımyz. Biz Qazaqstannyń Belarýs Respýblıkasynyń BUU Qaýipsizdik Keńesine bergen ótiniminde daýys berý protsesinde kórsetken qoldaýyn da baǵalaımyz», - dep atap ótti S. Aleınık.

Aıta keteıik, Premer-Mınıstrdiń orynbasary – Syrtqy ister mınıstri Murat Nurtileý Mınskidegi UQShU syrtqy ister mınıstrleriniń keńesine qatysady.

19-23 maýsymda Mınskide UQShU Syrtqy ister mınıstrleri keńesiniń kezekti otyrysy ótkiziledi. Qazaqstandyq delegatsııany Premer-Mınıstrdiń orynbasary – Syrtqy ister mınıstri Murat Nurtileý basqarady.

https://kaz.inform.kz/news/minskide-ukshu-syrtky-ister-ministrlerinin-kenesi-otedi_a4078369