Qazaqstan men Belarýs ózara stýdentter men ǵalymdarǵa jeńildikter usynady

ASTANA. QazAqparat - Májilistiń jalpy otyrysynda «Qazaqstan men Belarýs úkimetteri arasyndaǵy 1997 jylǵy sáýirdegi tabys pen múlikke qosarlanǵan salyq salýdy boldyrmaý jáne salyqtan jaltarýǵa jol bermeý týraly kelisimge ózgerister men tolyqtyrýlar engizý týraly hattamany ratıfıkatsııalaý týraly» zań jobasyn maquldady, dep habarlaıdy QazAqparat.

«Birinshiden, Hattama aqparat almasýdy keńeıtý jolymen salyq qyzmetteri arasyndaǵy yntymaqtastyqty damytýǵa múmkindik beredi, al ekinshiden, rezıdenttikti rastaıtyn qujattardy taný rásimin jeńildetýge jol ashady. Kelisim salyq qyzmetterine qoltańbasy men mórin zańdastyrmaı rezıdenttikti rastaıtyn túpnusqadaǵy qujattardy qabyldaýǵa múmkindik beretin erejemen tolyqtyryldy.

Úshinshiden, Hattamaǵa oqıtyn memleketinde stýdentterge granttar, stıpendııalar men jaldanyp isteıtin jumystan alatyn syıaqylar boıynsha jeńildikterge jáne shegerimderge quqyq beretin norma engizý eskerilgen. Osy arqyly oqıtyndar úshin qolaıly jaǵdaı jasalmaq», - dedi zań jobasy boıynsha baıandamaǵa jasaǵan Qarjy mınıstri Baqyt Sultanov.

Munymen qosa, atalǵan kelisim professorlardy, oqytýshylar men ǵylymı qyzmetkerlerdi shet memlekette 2 jyl boıynda salyq salýdan bosatý jolymen eki el arasyndaǵy yntymaqtastyqty odan ári damytýǵa múmkindik beredi.

Hattamada Konventsııa qoldanylatyn Qazaqstan jáne Belarýs salyqtarynyń ataýlary jańǵyrtyldy. Osy oraıda «Protsentter» jáne «Roıaltı» «Táýelsiz jeke qyzmetter» baptarynyń erejeleri jáne taǵy basqalary naqtylandy.

«Qazaqstan men Belarýs Respýblıkasy arasyndaǵy taýar aınalymy sońǵy 10 jylda (2007-2016 jyldary) 5,8 mlrd AQSh dollaryn qurady. Qazaqstandyq eksporttyń negizgi baptarynda óńdelmegen alıýmınıı men temirden nemese qospalanǵan bolattan jasalatyn tegis ılem qamtylǵan. Import qurylymynda aýyl sharýashylyǵy tehnıkasy (traktorlar), qant qyzylshasy, shınalar jáne pnevmatıkalyq rezeńke tystar jáne jıhaz basymdyqqa ıe.  Hattamany iske asyrý memlekettik bıýdjetten qarjy shyǵyndaryn talap etpeıdi. Osy qujattyń eki memleket arasyndaǵy salyq salý máselelerinde zańnamalyq baza retindegi mańyzdy rólin de atap ótkim keledi», - dedi mınıstr.