Qazaqstan men Belarýs qorǵanys mınıstrleri áskerı yntymaqtastyqtyń perspektıvalaryn talqylady
Dástúr boıynsha shetelden kelgen meıman «Otan qorǵaýshylar» monýmentine gúl shoqtaryn qoıý rásimine qatysty. Qorǵanys mınıstrliginde Belarýs memleketinen kelgen áriptesin Qazaqstan Qorǵanys mınıstri general-polkovnık Rýslan Jaqsylyqov qarsy aldy.
Bıyl Belarýs Respýblıkasy Shanhaı Yntymaqtastyq Uıymyna múshelikke qabyldaý rásimderin aıaqtady. Osyǵan baılanysty Qazaqstannyń Qorǵanys mınıstri Belarýs eliniń tolyqqandy múshe mártebesin alýy uıymǵa sapaly jańa serpin beretinine senim bildirdi.
Kezdesý barysynda general-polkovnık Rýslan Jaqsylyqov pen general-leıtenant Vıktor Hrenın jaýyngerlik daıyndyq, birlesken oqý-jattyǵýlar, áskerı-sporttyq jarystar ótkizý máselelerine toqtaldy.
– Qazaqstan Belarýs Respýblıkasymen qarym-qatynasty damytýǵa erekshe mán beredi. TMD, UQShU jáne basqa da halyqaralyq uıymdar sheńberinde Qazaqstan men Belarýs qorǵanys jáne qaýipsizdik máselelerinde ózara belsendi is-áreket jasaıdy. Qorǵanys salasyndaǵy yntymaqtastyqtyń bul túri Qazaqstan men Belarýs arasyndaǵy senim men dostyq qatynastardy nyǵaıtýǵa, oǵan qosa óńirdegi qaýipsizdik pen turaqtylyqty qamtamasyz etýge yqpal etedi, - dedi general-polkovnık R. Jaqsylyqov.
Taraptardyń aıtýynsha, yntymaqtastyqtyń negizgi baǵyttarynyń biri – áskerı bilim berý. Belarýs áskerı joǵary oqý oryndarynda qazaqstandyq ofıtserler men kýrsanttar bilim alyp júr. Jýyrda Belarýs Respýblıkasynyń Áskerı akademııasynda Qazaqstan Respýblıkasynyń Áskerı óner aýdıtorııasy ashylmaq.
Qorǵanys mınıstri general-polkovnık Rýslan Jaqsylyqov áriptesine Belarýs sývorovshylary alǵash ret qatysatyn «Aıbyn» X Halyqaralyq áskerı-patrıottyq jastar jıynyn ótkizý bastamasyn qoldaǵany úshin alǵysyn bildirdi.
Qorǵanys mınıstrleri ekijaqty yntymaqtastyq josparyn iske asyrýdyń joǵary qarqynyn atap ótip, Qazaqstan men Belarýs qarýly kúshteriniń áskerı áýeaılaqtarynda áskerı áýe kemelerin qabyldaýdy, áýeaılaqtyq-tehnıkalyq qamtamasyz etýdi jáne kúzetýdi uıymdastyrý týraly kelisimge qol qoıdy. Sapar aıasynda Vıktor Hrenın Qazaqstan Respýblıkasynyń Ulttyq qorǵanys ýnıversıtetinde boldy. Onda joǵary oqý ornynyń oqý-materıaldyq bazasymen tanysyp, Belarýs áskerı óner aýdıtorııasyn aralady.