Qazaqstan men Belarýs birlesip Ekinshi dúnıejúzilik soǵys týraly fılm túsirdi

NUR-SULTAN. QazAqparat – «Qazaqfılm» men «Belarýsfılm» birlesip «Leto 1941 goda» atty tarıhı fılm túsirdi. Bul týraly Qazaqstandaǵy Belarýs Respýblıkasynyń Tótenshe jáne Ókiletti elshisi Pavel Ýtıýpın málim etti, dep habarlaıdy QazAqparat tilshisi.

«Ekinshi dúnıejúzilik soǵys - Belarýs pen Qazaqstanǵa ortaq qasiret. Tıisinshe Jeńis te - búkil KSRO elderine ortaq. Ókinishke qaraı, Uly otan soǵysyna attanǵan árbir úshinshi belarýs oralmady. Soǵys kezinde Belarýs aýmaǵyn azat etý jolynda kúresken 80-nen astam qazaqstandyq túrli dárejedegi marapatqa ıe boldy. Uly Otan soǵysy taqyryby ortaq bolǵandyqtan Belarýs pen Qazaqstan birlesken jobalardy qolǵa alyp jatyr. Sonyń biri - bıyl jazda «Qazaqfılm» men «Belarýsfılm» birlesip «Leto 1941 goda» atty fılm túsirdi. Jýyrda tusaýkeseri ótedi dep josparlanyp otyr», - dedi Pavel Ýtıýpın elordada bastalǵan Belarýs eliniń mádenıet kúnderi saltanatty sharasy barysynda.

Elshiniń málimetinshe, atalǵan fılm qazaqstandyq partızan Ádı Sháripov týraly bolmaq.

Buǵan deıin habarlaǵanymyzdaı, Qazaqstanda Belarýs respýblıkasynyń mádenıet kúnderi bastaldy.

Mádenıet kúnderi aıasynda elorda jurtshylyǵy Belarýs fılmderin tegin tamashalaı alady.

Odan bólek, astanalyqtar nazaryna kórme men merekelik kontsert usynylady.