Qazaqstan men Belarýs arnaıy operatsııalar kúshteriniń qyzmetkerleri Nursultan shyńyna shyqty

NUR-SULTAN. QazAqparat – Qazaqstan men Belarýstiń «Orbulaq-2022» birlesken oqý-jattyǵýy aıaqtaldy. Birlesken taktıkalyq oqý-jattyǵý barysynda eki eldiń arnaıy operatsııalar kúshteriniń áskerı qyzmetshileri Іle Alataýyndaǵy Nursultan shyńyn baǵyndyrdy, dep habarlaıdy QazAqparat QR Qorǵanys mınıstrligine silteme jasap.

Eki apta boıy eki eldiń áskerı qyzmetshileri «Kóktal» oqý polıgonynda jáne Qazaqstan Respýblıkasy Qarýly kúshteriniń taý daıyndyǵy ortalyǵynda shartty zańsyz qarýly quralymdardy izdeý jáne joıý boıynsha birlesken is-qımyldardy pysyqtady.

«Oqý-jattyǵý barysynda tájirıbeli qazaqstandyq nusqaýshylardyń basshylyǵymen Belarýstiń arnaıy operatsııalar kúshteri bólimsheleriniń jeke quramy taý kedergilerin eńserý tehnıkasyn, taktıkalyq tásilderdi oryndaýdy jáne taýly jerlerdiń kúrdeli jaǵdaılarynda jaýyngerlik is-qımyldardy júrgizýdi ıgerdi», - dep atap ótti oqý-jattyǵý basshysy polkovnık Aıdar Slıamgalıev.

Jetisý oblysyndaǵy «Kóktal» oqý polıgonynda arnaıy operatsııany birlesip josparlaý jáne barlaý áreketterin júrgizý ádistemesin ázirleý máseleleri pysyqtaldy. Áskerı qyzmetshilermen artıllerııa men áskerı avıatsııanyń ushýyn, atysyn uıymdastyrýǵa arnalǵan praktıkalyq sabaqtar ótkizildi.

Esterińizge sala keteıik, ótkizilgen halyqaralyq taktıkalyq-arnaıy oqý-jattyǵýlar taý daıarlyǵyn jetildirýge jáne arnaıy maqsattaǵy bólimsheler jeke quramynyń jaýyngerlik daǵdysyn arttyrýǵa baǵyttalǵan bolatyn.

Oqý-jattyǵý elimizdiń eń bıik shyńdarynyń bestigine kiretin Nursultan shyńyna shyǵýmen aıaqtaldy. Eki eldiń erekshe kózge túsken áskerı qyzmetshilerine «Qazaqstan alpınısi» tósbelgisi tabystaldy.

Foto : gov.kz