Qazaqstan men Belarýs arasynda aýyl sharýashylyǵy taýar aınalymy 23,5% artty

NUR-SULTAN. QazAqparat - Qazaqstan men Belarýs arasyndaǵy aýyl sharýashylyǵy ónimderiniń taýar aınalymy 23,5 paıyzǵa artty, dep habarlaıdy QazAqparat.

Aıta keteıik, jaqynda QR Aýyl sharýashylyǵy mınıstri Erbol Qarashókeev Belarýs Respýblıkasynyń Qazaqstandaǵy Tótenshe jáne ókiletti elshisi Pavel Ýtıýpınmen aýyl sharýashylyǵy salasyndaǵy ekijaqty yntymaqtastyq máselelerin talqylady.

Taraptar Qazaqstan delegatsııasynyń Belarýs Respýblıkasyna mal sharýashylyǵy salasyndaǵy Belarýs tehnologııalarymen, taýarly sút fermalaryna arnalǵan jabdyqtar óndirisimen tanysý maqsatyndaǵy jumys saparyn uıymdastyrýǵa kelisti.

Sondaı-aq, Ortalyq Azııa men Taıaý Shyǵysta balamasy joq veterınarlyq vaktsınalar shyǵaratyn biregeı zaýyt qurý jobasy talqylanyp, «Belarýs Ulttyq bıotehnologııalyq korporatsııasy» JAQ qyzmetimen tanysty.

Sondaı-aq, olar Qazaqstanda Belarýs aýyl sharýashylyǵy kórmesi men Agrarlyq forýmyn ótkizýdiń sharttary men ýaqytyn aıqyndady.

Eki el arasyndaǵy salaǵa qatysty ózara is-qımyl Aýyl sharýashylyǵy men azyq-túlik salasyndaǵy yntymaqtastyq týraly kelisim aıasynda júzege asyrylady.

Statıstıka organdarynyń derekteri boıynsha Qazaqstan men Belarýs arasyndaǵy aýyl sharýashylyǵy ónimderi men aýyl sharýashylyǵy shıkizatyn qaıta óńdeý ónimderiniń taýar aınalymy 2021 jyldyń qańtar-maýsym aılarynda 125,9 mln AQSh dollaryn qurady.

Bul - 2020 jyldyń sáıkes kezeńimen salystyrǵanda 23,5 paıyzǵa artyq (101,9 mln AQSh dollary).