Qazaqstan men Belgııa yntymaqtastyqty nyǵaıtýǵa nıetti
Júzdesý barysynda taraptar ekijaqty jáne kópjaqty formattaǵy Qazaqstan-Belgııa yntymaqtastyǵynyń qazirgi ahýaly men perspektıvalaryn talqylady, dep habarlaıdy QazAqparat QR Syrtqy ister mınıstrliginiń baspasóz qyzmetine silteme jasap.
Qazaqstan Prezıdenti Qasym-Jomart Toqaevtyń bastamasymen «tyńdaıtyn memleket» tujyrymdamasy aıasynda Qazaqstanda júrgizilgen saıası reformalardy talqylaý suhbattyń jeke taqyryby boldy.
L.Lıbaýt Memleket basshysy usynǵan jańashyldyqtarǵa oń baǵa berdi.
Ekonomıkalyq dıplomatııa aıasynda suhbattasýshylar aýylsharýashylyq jáne jeńil ónerkásip salasyndaǵy yntymaqtastyq perspektıvalaryn talqylady. Sondaı-aq, taraptar belgııalyq AWEX jáne FIT ınvestıtsııalyq agenttikteriniń qoldaýymen 2021 jyldyń kúzinde josparlanǵan belgııalyq kásiporyndardyń Qazaqstanǵa sapary týraly aıtty.
Vaktsına jasaý salasyndaǵy yntymaqtastyq sheńberinde dıplomattar Qazaqstan men Belgııadaǵy halyqqa egý tájirıbesimen bólisti. M.Baımuhan belgııalyq áripteske qazaqstandyq «QazVac» vaktsınasy týraly aqparatty usyndy.
Kópjaqty yntymaqtastyq sheńberinde EO men EQYU aıasyndaǵy ózara is-qımyl máseleleri, sondaı-aq 2021 jyly 10 mamyrda Brıýsselde ótken «Qazaqstan Respýblıkasy - Eýropalyq Odaq» Yntymaqtastyq Keńesiniń 18-shi otyrysynyń nátıjeleri talqylandy.
Kezdesý qorytyndysy boıynsha taraptar Qazaqstan-Belgııa qatynastaryn ár túrli baǵytta damytý týraly ýaǵdalasty, sonymen qatar eki el arasyndaǵy ózara is-qımyldy arttyrýdyń birlesken josparlaryn belgiledi.
2005-2020 jyldarda Belgııanyń Qazaqstan ekonomıkasyna salǵan ınvestıtsııasynyń kólemi 8,9 mlrd. AQSh dollaryn qurady. 2020 jyly Qazaqstan men Belgııa arasyndaǵy saýda kólemi 2019 jylmen salystyrǵanda 8%-ǵa tómendep, 322 mln. AQSh dollaryn qurady.
Qazaqstanda Belgııa kapıtalynyń qatysýymen 75 kompanııa tirkelgen, olar jańartylatyn energııa kózderi, hımııalyq ónimder óndirisi, onkologııalyq klınıkalarǵa medıtsınalyq jabdyqtarmen qamtamasyz etý salasynda birqatar jobalardy júzege asyrady.