Qazaqstan men Ázerbaıjannyń taýar aınalymy 2 esege artty

ASTANA. QazAqparat - Búgin Astanada QR Investıtsııalar jáne damý mınıstri Jeńis Qasymbek pen Ázerbaıjan Respýblıkasynyń Energetıka mınıstri Parvız Shahbazovtyń ekijaqty kezdesýi ótti, dep habarlaıdy QazAqparat.

«Kezdesý barysynda vedomstvo basshylary saýda, ınvestıtsııa, eksporttyq operatsııalar sııaqty salalardaǵy ekijaqty yntymaqtastyq máselelerin talqylady. Jeńis Qasymbek 2017 jyldyń sáýirinde Memleket basshysynyń Ázerbaıjanǵa jasaǵan resmı sapary barysynda qol jetkizgen ýaǵdalastyqtardyń sátti júzege asyrylýyn atap ótti. Naqty aıtqanda, eki el arasyndaǵy taýar aınalymy 2018 jyldyń alǵashqy 8 aıynda 2 esege artyp, 168 mln AQSh dollaryn qurady (2017 jyldyń osyndaı kezeńi - $ 81,5 mln)», - delingen QR IDM baspasóz qyzmetiniń málimetinde.

Óz kezeginde Parvız Shahbazov úkimetaralyq komıssııanyń kezdesýlerin, ártúrli saladaǵy seriktestermen qarym-qatynas ornatý jáne eki eldiń isker toptarynyń jıyndaryn uıymdastyrý arqyly qatynastardy tereńdetýdiń mańyzdylyǵyna toqtaldy.

Atap aıqanda,   2018 jyldyń qańtar-tamyz aılarynda Qazaqstan men Ázerbaıjan arasyndaǵy syrtqy saýda aınalymy 168,1 mln AQSh dollaryn qurap, 2017 jyldyń sáıkes kezeńimen salystyrǵanda 106,3 paıyzǵa ósken. Esepti kezeńde Qazaqstannan Ázerbaıjanǵa eksport 134,6 mln AQSh dollaryna jetti.

2018 jyldyń atalǵan merziminde Ázerbaıjannan Qazaqstanǵa ımport 33,5 mln dollardy qurady. Bul kórsetkish 2017 jyldyń sáıkes kezeńimen salystyrǵanda 75,7 paıyzǵa (19,1 mln dollar) artyq.