Qazaqstan men Ázerbaıjannyń Joǵary memleketaralyq keńesiniń birinshi otyrysy ótti
Prezıdent óz sózinde qonaqjaılyq kórsetkeni úshin ázerbaıjan tarapyna rızashylyǵyn bildirdi.
Qasym-Jomart Toqaev Ilham Geıdar oǵlyn Ázerbaıjan Respýblıkasynyń Prezıdenti saılaýynda aıqyn jeńiske jetýimen taǵy da quttyqtady. Prezıdenttiń aıtýynsha, daýys berý qorytyndysy Ázerbaıjan kóshbasshysynyń strategııalyq baǵdary jalpyhalyqtyń qoldaýyna ıe bolǵanyn jáne oǵan jurtshylyqtyń senimi joǵary ekenin anyq kórsetti.
– Sizdi ázerbaıjan halqynyń jalpyǵa birdeı tanylǵan kóshbasshysy dep bilemiz jáne halyqaralyq arenada da osyndaı tulǵa retinde qabyldaıdy. Sonymen qatar Ázerbaıjannyń óz egemendigin qalpyna keltirý isinde tarıhı jeńiske jetkenine shyn júrekten qýanyshtymyz, – dedi Qasym-Jomart Toqaev.
Memleket basshysy Astana men Baký yntymaqtastyqtyń joǵary deńgeıin kórsetip, birlesken jumystyń jańa baǵyttaryn damytyp otyrǵanyn erekshe atap ótti
– Jańa ǵana biz saýda-ekonomıkalyq, ınvestıtsııalyq yntymaqtastyqqa, halyqaralyq arenadaǵy ózara yqpaldastyqqa qatysty barlyq máseleni egjeı-tegjeıli talqyladyq jáne ortaq uıǵarymǵa keldik. Bul Qazaqstan men Ázerbaıjannyń, shyn máninde, strategııalyq seriktes, odaqtas memleketter ekenin kórsetedi. Osy oraıda eki el úkimetteri búgin qol qoıylǵan qujattar, kelisimder túrindegi ýaǵdalastyqtardy júzege asyrýmen aınalysatynyn eskersek, yntymaqtastyǵymyzdyń perspektıvasy óte zor. Men COP29 sammıtine qatysýǵa shaqyrýyńyzdy yqylaspen qabyl alamyn. Mundaı sharany ótkizý – Ázerbaıjan memleketi men onyń dıplomatııasy úshin aıtýly tarıhı jetistik. Sammıt qazirgi klımat máselelerin retteý jáne jahandyq yntymaqtastyqty nyǵaıtý turǵysynan óte mańyzdy. Baký bul mindetti abyroımen atqaratyny sózsiz, – dedi Memleket basshysy.
Qazaqstan Prezıdenti Ázerbaıjanmen aradaǵy saýda-ekonomıkalyq qatynastardyń qarqyndy damyp kele jatqanyn atap ótti
– Qazaqstan men Ázerbaıjan arasyndaǵy taýar aınalymy 2020 jyldan beri 5 ese artty. Árıne, bul tsıfr sonshalyqty tańqalarlyq kórsetkish emes shyǵar. Bul baǵytta jumys isteý kerek, alaıda qazirgi saýda qarqyny oń baǵalaýǵa laıyq. Elderimiz aıtarlyqtaı ekonomıkalyq áleýetke ıe. Biz budan da zor jetistikke jetemiz dep oılaımyn. Shyn máninde, yntymaqtastyqtyń aýqymy óte keń. Biz búgin munaı men gazdan bólek, kólik pen logıstıkadan bastap, tsıfrlandyrýǵa deıingi máselelerdiń bárin qarastyrdyq. Halyqaralyq arenada tabysty jumys istep jatqanymyzǵa kóńilim tolady. Birikken Ulttar Uıymyndaǵy jáne basqa da halyqaralyq uıymdardaǵy delegatsııalarymyz ózara jemisti qarym-qatynas jasap otyr. Bul baǵyttaǵy jumystar jalǵasady dep oılaımyn, – dedi Memleket basshysy.
Prezıdenttiń pikirinshe, qazaq-ázerbaıjan qatynastaryn nyǵaıtýǵa mádenıet salasyndaǵy ýaǵdalastyqtardy júzege asyrý isi de oń septigin tıgizýde.
Máselen, qasıetti Túrkistan men Shýsha shaharlary, sondaı-aq Oral men Mıngechevır, Shymkent pen Gıandja qalalarynyń arasynda baýyrlastyq qatynas ornady.
– Men elderimiz arasyndaǵy mádenı baılanystarǵa basa mán beremin. Bul halyqtarymyzdy jaqyndatý turǵysynan óte mańyzdy. Sýmgaıt qalasyndaǵy kóshege Ahmet Baıtursynulynyń esimimen ataldy. Biz ol úshin alǵys aıtamyz. Sondaı-aq Astana qalasyndaǵy kóshege Geıdar Álıevtiń esimi berildi. Bul eki eldiń uly tulǵalaryn ulyqtaýǵa arnalǵan eleýli oqıǵa boldy. Byltyr Ázerbaıjanda Qazaqstan mádenıetiniń kúnderi tabysty ótti. Álginde ózińiz aıtqandaı, erteń Fızýlı qalasynda Qurmanǵazy atyndaǵy Balalar shyǵarmashylyǵy ortalyǵyn ashamyz. Bul da bizdiń yqpaldastyǵymyz ben yntymaqtastyǵymyzdyń sımvoly bolatyny anyq, – dedi Qasym-Jomart Toqaev.Prezıdent Joǵary memleketaralyq keńestiń qyzmeti eki el yntymaqtastyǵyna tyń serpin beredi jáne qazaq-ázerbaıjan qatynastaryn jańa deńgeıge kóterýge yqpal etedi dep sanaıdy.
Ázerbaıjan Prezıdenti Joǵary memleketaralyq keńestiń alǵashqy otyrysynyń tarıhı mánine toqtaldy.
Onyń pikirinshe, Qasym-Jomart Toqaevtyń sapary men Memleketaralyq keńes otyrysynyń qorytyndysy eki el qarym-qatynasynyń aldaǵy kún tártibin aıqyndaıdy.
– Qazaqstan men Ázerbaıjan – baýyrlas memleketter. Halyqtarymyz ǵasyrlar boıy tatý, baýyrlas el retinde yntymaqtastyqta ómir súrip keledi. Sońǵy kezderi bizdiń bir-birimizge jasaǵan saparymyzdyń jıiledi. Osydan-aq ózara qatynastardyń qarqyny qanshalyqty kúsheıe túskeni aıqyn kórinedi. Biz Qazaqstannyń ár tabysyna qýanamyz. Sizdi jáne búkil baýyrlas Qazaqstan halqyn áleýmettik-ekonomıkalyq jáne ınnovatsııalyq damý jolyndaǵy keremet jetistikterimen quttyqtaǵym keledi. Sonymen qatar biz eki elge ortaq jobalar týraly áńgimelestik. Men Qarabaqty qalpyna keltirý isine baýyrlas el retinde járdem bergeni úshin Qazaqstan Prezıdentine rızashylyǵymdy bildirdim. Fızýlı qalasynda Qurmanǵazy atyndaǵy Balalar shyǵarmashylyǵy ortalyǵy qazaq halqynyń ázerbaıjan halqyna tartýy retinde Prezıdent Toqaevtyń bastamasymen boı kóterdi. Erteń biz dostyǵymyzdyń ortalyǵyna aınalatyn osy nysandy ashamyz. Sondaı-aq Ázerbaıjannyń egemendigin qalpyna keltirý máselesinde qoldaý bildirgenderińiz úshin alǵys aıtamyz. Álbette, Ázerbaıjanda Qazaqstandy bári senimdi dos ári odaqtas el retinde tanıdy dep oılaımyn, – dedi Ilham Álıev.
Qazaqstan men Ázerbaıjannyń Joǵary memleketaralyq keńesiniń alǵashqy otyrysynda saýda-ekonomıka, ınvestıtsııa, munaı-gaz, kólik-logıstıka salalaryndaǵy yntymaqtastyqty nyǵaıtý, sondaı-aq jańartylatyn energııa kózderi, tsıfrlyq kommýnıkatsııa jáne mádenı-gýmanıtarlyq baǵyttardaǵy yqpaldastyqty damytý máseleleri qarastyryldy.
Aıta keteıik, b.gin Qazaqstan Prezıdenti Ázerbaıjan Respýblıkasyna memlekettik saparmen bardy.
Qasym-Jomart Toqaevty Ázerbaıjan Prezıdenti «Zagýlbada» qarsy aldy.
Memleket basshysy Ázerbaıjan Prezıdentimen kelissóz júrgizdi.