Qazaqstan men Ázerbaıjan júk tasymaly boıynsha Eýropa men Azııanyń arasyndaǵy kópirge aınaldy

BAKÝ. QazAqparat - Búgin Bakýde BAQ úshin  baspasóz máslıhatyn ótkizgen Qazaqstannyń Ázerbaıjandaǵy elshisi Beıbit Isabaev eki eldiń saıası, saýda-sattyq jáne ekonomıkalyq qarym-qatynasynyń nyǵaıyp kele jatqanyn aıtyp berdi, dep habarlaıdy «QazAqparat» HAA-nyń Ázerbaıjandaǵy tilshisi.

Elshi Qazaqstan Respýblıkasynyń Prezıdenti Nursultan Nazarbaevtyń osy jyldyń 30 qazanynda ótetin Baký-Tbılısı-Kars (BTK) temir jol magıstraliniń resmı túrde ashylý saltanatyna qatysatynyn atap ótti.

«BTK-ny Qytaıdan Qazaqstan arqyly Ázerbaıjan, Grýzııa, Túrkııa, odan ary Eýropaǵa jol tartatyn negizgi Halyqaralyq Transkaspıılik kóliktik baǵdardyń (HTKB) magıstrali dep aıtýǵa bolady. BTK-nyń ashylýy - ol tarıhı oqıǵa. Shynynda da, aýqymdy joba Uly Jibek joly boıyndaǵy Azııa men Eýropa elderiniń  tranzıttik jáne kóliktik qarym-qatynasyna tyń serpin beredi», - deıdi elshi.

Dıplomattyń aıtýyna qaraǵanda, alǵashqy 82 konteınerdiń eki eshalony Qytaı men Qazaqstanǵa shyǵyp ta qoıǵan.

«Bizdiń quram qazaqstandyq bıdaıdy Túrkııanyń Mersın portyna apara jatyr. Qazirgi ýaqytta qazaqstandyq kómirdi Rýmynııaǵa jiberý jumysy talqylanýda», - deıdi ol.

Sonymen qatar, QR Kavkaz marshrýtynyń da logıstıkasyn, tranzıttik jáne kóliktik áleýetin arttyrýǵa, onyń jańǵyrtylýyna kúsh salyp jatyr. Osyǵan baılanysty, Azııa men Eýropa arasyndaǵy júk tasymalynyń jetkizilýi turǵysynda Qazaqstan mańyzdy ról atqarady.

«Ótken jyldan beri HTKB Belarýs, Latvııa, Lıtva, Túrkııa, Bolgarııa, Rýmynııa, Moldova, Grýzııa, Fınlıandııa jáne Ázerbaıjan elderi enetin «Vıkıng» konteınerlik poıyzyna qosyldy. Osylaısha, bizdiń elderimiz óz aýmaǵyndaǵy tranzıttik jáne kóliktik áleýetti arttyrýǵa den qoıyp keledi. Bul ekijaqty ekonomıkalyq seriktestikti bekite túsedi», - deıdi ol.
 

Elshiniń sózine sáıkes, aǵymdaǵy jyldyń 9 aıy boıynsha eki eldiń temir jol kóligi arqyly ózara júk tasymaly 1,5 mln tonnaǵa jetken. Bul ótken jyldyń salystyrmaly kezeńimen alyp qaraǵanda 146 paıyzǵa artyq kórsetkish. Jyldyń sońyna deıin bul sandar 2-2,5 mln tonnaǵa deıin jetedi dep kózdelip otyr. Tranzıttik tasymal boıynsha QR men AR arasynda aıtarlyqtaı ósim bar. Bul kórsetkish jańa dálizdiń mańyzdyǵlyǵyn odan ary dáleldeı túsedi.

«Búgingi kúni Qazaqstan men Ázerbaıjan júk tasymaly úshin Eýropa men Azııanyń arasyndaǵy «tranzıttik kópirge» aınaldy dep aıtýǵa ábden bolady», - deıdi dıplomat.

Onyń aıtýyna qaraǵanda, BTK jobasyn iske asyrýda qazaqstandyq kólik quraý ónimderi qoldanylǵan.

«Ázerbaıjandaǵy negizgi temir jol magıstraldaryn kúrdeli jóndeýden ótkizý úshin Aqtóbedegi relsbelaǵashtyq zaýyttyń ónimi paıdalanyldy. Jańa dálizdiń tyń aýmaqtarynda qazaqstandyq «Lokomotıv qurastyrý zaýyty» men «Elektrovoz qurastyrý zaýytynyń» teplovozdary men elektrovozdary qoldanylady. Qazirgi ýaqytta 10 teplovoz jumys istep tur. 2020 jylǵa deıin 40 júk tasymaldaıtyn elektrovoz jetkiziledi. Qazaqstandyq elektrovozdardyń alǵashqy ekeýi 2017 jyldyń sońyna deıin, 24-i 2018 jyly, 14-i 2019 jyly ákelinedi», - deıdi B.Isabaev.

Belgili bolǵanyndaı, 2016 jyldyń qorytyndysy boıynsha QR men AR arasynda taýar aınalymy 7,9 paıyzdy kórsetse, 2017 jyldyń 9 aıy boıynsha bul kórsetkish 12-15 paıyzdyq deńgeıge deıin jetken.

Brıfıng sońynda B.Isabaev Qazaqstan men Ázerbaıjan arasyndaǵy úılestirilgen ári tıimdi tranzıttik jáne kóliktik seriktestik aldaǵy ýaqytta eki eldiń ekonomıkalyq damýyna jańa múmkindikterdi ashatynyn málim etti.