Qazaqstan men Ázerbaıjan Transkaspıı dáliziniń áleýetin damytýda

BAKÝ. QazAqparat – Qazaqstan Respýblıkasynyń Indýstrııa jáne ınfraqurylymdyq damý mınıstri Marat Qarabaev ázerbaıjandyq áriptestermen ekijaqty kezdesýler ótkizý maqsatynda Baký qalasyna jumys saparymen bardy. Mınıstrmen birge qazaqstandyq delegatsııanyń quramynda kólik-logıstıka uıymdarynyń 40-tan astam ókili boldy, dep habarlaıdy «QazAqparat» HAA menshikti tilshisi.

Delegatsııa quramyna «Aqtaý teńiz saýda porty» UK» AQ, «Aqtaý teńiz soltústik termınaly» JShS, «Qazaqstan temir joly» UK» AQ, «Quryq porty» JShS, «THKB» halyqaralyq qaýymdastyǵy, «SEMURG INVEST» JShS, «PTC Holding» JShS, «Kaztsınk» JShS jáne basqa uıymdardyń ókilderi kirdi.

Sapar aıasynda mınıstr Marat Qarabaev pen Qazaqstannyń Ázerbaıjandaǵy Elshisi Álim Baıel Ázerbaıjan Respýblıkasynyń tsıfrlyq damý jáne kólik mınıstri Rashad Nabıevpen kezdesý ótkizdi. Olar orta dáliz aıasynda júk tasymaldaýdyń jáne logıstıkany jolǵa qoıýdyń ózekti máseleleri boıynsha pikir almasty. Taraptar Transkaspıı halyqaralyq kólik baǵytynyń (THKB) áleýetin joǵary baǵalaı otyryp, osy turǵydaǵy áriptestikti tereńdetýge ózara múddeliligin rastady. THKB-nyń tar jerlerin joıý boıynsha jumysty jalǵastyrýǵa kelisti.

Sonymen qatar qazaqstandyq delegatsııa birqatar nysannyń, sonyń ishinde Baký Alıat halyqaralyq saýda portynyń, Govsan portynyń, Bash-Alıat temirjol stantsııasynyń, Baký keme jasaý zaýytynyń, Absheron logıstıkalyq ortalyǵynyń, Baký temirjol jolaýshylar vokzalynyń jumysymen tanysty.