Qazaqstan men Ázerbaıjan prezıdentteri Bakýde kelissóz júrgizdi

<p>Memleket basshysy Qasym-Jomart Toqaev Bakýge jumys sapary barysynda Ázerbaıjan Prezıdentimen kezdesti.&nbsp;<a href="https://kaz.inform.kz/" target="_blank" rel="noopener">Kazinform</a>&nbsp;bul týraly <a href="https://www.akorda.kz/kz/kasym-zhomart-tokaev-pen-ilham-aliev-kelissoz-zhurgizdi-24105051" target="_blank" rel="noopener">Aqordaǵa</a> silteme jasap habarlaıdy.</p>

Qasym-Jomart Toqaev dástúrli qonaqjaılyǵy men BUU-nyń Ortalyq Azııa elderi ekonomıkalaryna arnalǵan arnaıy baǵdarlamasynyń (SPEKA) alǵashqy sammıtin uıymdastyrǵany úshin Ilham Álıevke alǵys aıta otyryp, Bakýdi «Kaspıı óńiriniń injý-marjany», álemdegi eń ádemi qalalardyń biri dep atady.

Memleket basshysy oraıly sátti paıdalanyp, Ilham Álıev pen baýyrlas Ázerbaıjan halqyn halyqaralyq quqyq jáne BUU Qaýipsizdik Keńesiniń qararlaryna saı eldiń aýmaqtyq tutastyǵyn saqtaýǵa qol jetkizgenimen quttyqtady. Prezıdent munyń aıtýly oqıǵa ekenine nazar aýdardy.

«Bul Sizdiń memlekettilikti nyǵaıtýǵa, halqyńyzdyń ál-aýqatyn kóterip, Bakýdiń álemdik qoǵamdastyqtaǵy bedelin arttyrýǵa baǵyttalǵan myqty kóshbasshylyǵyńyzdyń, kóregen ári dana saıasatyńyzdyń arqasynda iske asty. Meniń oıymsha, bul, shyn máninde, tarıhı oqıǵa», – dedi Prezıdent.

Memleket basshysy Qazaqstan men Ázerbaıjan arasyndaǵy ózara qarym-qatynastyń qarqyndy damyp kele jatqanyn atap ótti.

«Jańa jobalar qolǵa alynyp jatyr. Bizdiń aramyzda eshqandaı túıtkildi másele joq. Biz – shynaıy strategııalyq seriktespiz, tipti, Kaspıı teńiziniń eki jaǵyn meken etken kórshilermiz. Strategııalyq qatynastardy nyǵaıtý jáne odaqtastyq yntymaqtastyqty tereńdetý jónindegi birlesken deklaratsııanyń qabyldanýy, sondaı-aq Joǵary memleketaralyq keńestiń qurylýy qazaq-ázerbaıjan qarym-qatynasyn jańa deńgeıge kótergen tarıhı oqıǵa boldy. Men ózimmen birge Bakýge tolyqqandy delegatsııa alyp keldim. Óıtkeni búgingi kezdesýde, Ázerbaıjan tarapymen shyn máninde, tolyq formatty, mazmundy kelissózder júrgizemiz dep sanaımyn. Bul – ózara qarym-qatynasqa qatysty birqatar másele boıynsha pikir almasý úshin jaqsy múmkindik», – dedi Memleket basshysy.

Foto: Aqorda

Óz kezeginde Ázerbaıjan Prezıdenti SPEKA sammıtine qatysqany úshin Qasym-Jomart Toqaevqa alǵys aıtty.

«Biz – dostas, baýyrlas ári seriktes eldermiz. Sońǵy jyldary resmı saparlar aıasynda, eki el úkimetteri músheleri men kompanııalary sheńberinde ózara baılanystardyń qarqyndy túrde damyp kele jatqany anyq baıqalady. Biz eki memleket arasyndaǵy ózara yqpaldastyqtyń eń joǵary deńgeıine jetip otyrmyz. Bul – táýelsiz el retinde damý tarıhymyzdaǵy aıtýly oqıǵa jáne halyqtarymyz arasyndaǵy baılanystardyń rýhy men sıpatyna saı keledi. Munyń solaı bolatyn jóni bar», – dedi Ázerbaıjan Prezıdenti.

Ilham Álıev Qazaqstan Prezıdentin kelesi jyly Ázerbaıjanǵa memlekettik saparmen kelýge shaqyrdy.

Kezdesý barysynda memleketter basshylary Kaspıı teńiziniń tabanymen talshyqty-optıkalyq baılanys jelisin tartý, Ázerbaıjan aýmaǵy arqyly Qazaqstan munaıyn tasymaldaý kólemin ulǵaıtý, Transkaspıı halyqaralyq kólik dálizin damytý, sondaı-aq energetıka men jańartylatyn energııa kózderi salalaryndaǵy perspektıvti jobalardy júzege asyrý sııaqty mańyzdy baǵyttarda birlesken jumystardy jandandyrý múmkindikterin talqylady.

Baýyrlas halyqtar arasyndaǵy mádenı-gýmanıtarlyq baılanystardy odan ári nyǵaıtýǵa basa mán berildi. Jýyq arada Qazaqstanda Ázerbaıjannyń, al Ázerbaıjanda Qazaqstannyń mádenıet kúnderi uıymdastyrylady.