Qazaqstan men Ázerbaıjan ókilderi birqatar qujattarǵa qol qoıdy

BAKÝ. QazAqparat - QR Prezıdenti Nursultan Nazarbaevtyń Ázerbaıjanǵa jasaǵan resmı sapary aıasynda eki eldiń úkimetteri arasynda túrli salalar boıynsha birqatar qujattarǵa qol qoıyldy, dep habarlaıdy «QazAqparat» HAA-nyń Bakýdegi tilshisi. 

Nursultan Nazarbaev pen Ilham Alıev Qazaqstan men Ázerbaıjan memleket basshylarynyń birlesken deklaratsııasyna qol qoıdy. «QTJ» UK AQ men «ÁTJ» JAQ arasynda logıstıka men temirjol transporttyq mashına jasaý salasyndaǵy strategııalyq yntymaqtastyq týraly kelisimge qol qoıyldy.

Eki eldiń syrtqy saıasat vedomstvolary 2017-2018 jyldarǵa arnalǵan yntymaqtastyq baǵdarlamasyn rásimdedi. Sonymen qatar, 1996 jyldyń 16 qyrkúıeginde tabys pen kapıtalǵa salynatyn salyqtarǵa qatysty salyq tóleýden jaltarýǵa qosarlanǵan salyq salýdyń aldyn alý jáne boldyrmaý úshin Qazaqstan men Ázerbaıjan úkimetteri arasyndaǵy konventsııaǵa ózgerister men tolyqtyrýlar engizý týraly QR jáne ÁR Úkimetteri arasyndaǵy hattamaǵa qol qoıyldy.

Sonymen qatar, karantın jáne ósimdikterdi qorǵaý salasyndaǵy yntymaqtastyq pen halyqaralyq avtomobıl qatynasy týraly kelisimder rásimdeldi.

Eske salaıyq, búgin Qazaqstan Prezıdentiniń Ázerbaıjandaǵy resmı sapary jalǵasýda.