Qazaqstan men Ázerbaıjan qarym-qatynasy ortaq tarıhı muraǵa negizdelgen – sarapshy

BAKÝ. QazAqparat – Ázerbaıjan men Qazaqstan ekijaqty qarym-qatynasyn odan ári damytý strategııasyn bekitýi qajet. Mundaı pikirdi Ázerbaıjan saıasattanýshysy, Kavkaz tarıhy ortalyǵynyń dırektory Rızvan Gýseınov aıtty, dep habarlaıdy QazAqparat menshikti tilshisi.

Onyń aıtýynsha, QR Prezıdenti Qasym-Jomart Toqaevtyń Bakýge sapary Ázerbaıjan táýelsizdiginiń 30 jylyndaǵy ekijaqty jáne resmı saparlar arasynda erekshe mańyzdy bolyp otyr.

«Otyz jylda bizdiń qarym-qatynasymyzda úlken negiz qalandy, biraq qazirgi sapardyń mańyzdy bolatyn sebebi – bizdiń aımaq ta, jalpy Eýrazııa da óte mańyzdy protsesterdi bastan keshýde. Bul protsesterdiń túıini burynǵy ortaǵasyrlyq logıstıkalyq kólik qýatyn qalpyna keltirý bolyp otyr. Tranzıt pen kólik qýaty – ejelgi túrki memleketteriniń negizi jáne olardyń basqa órkenıetterden artyqshylyǵy boldy. Qazirgi ýaqytta ol qalpyna keltirilip jatyr jáne bul túrki halyqtaryn, eń aldymen Qazaqstan, Ázerbaıjan jáne Túrkııany biriktiretin ıdeıanyń negizi», - dedi Rızvan Gýseınov.

Bul turǵyda sarapshy Qazaqstan men Ázirbaıjannyń qarym-qatynasy óte qarqyndy damyp keledi dep sanaıdy. Ázirbaıjan joldardyń edáýir bóligi qosylatyn hab retindegi logıstıkalyq róli óte mańyzdy. Qazaqstan da osy logıstıkalyq tizbekterde mańyzdy rólderdiń birin atqarady.

«Kómirsýtekter tasymaly úshin tranzıttik qýattardy keńeıtý, Kaspıı aımaǵynyń saýda qýattary da úlken ról atqarady. Osy máselelerdiń barlyǵy Qazaqstan men Ázerbaıjan arasynda tolyq ózara túsinistikke ıe. Qazir túrli vedomstvolardyń resmı qujattary men kelisimderi deńgeıinde osy salalardaǵy ekijaqty qarym-qatynastardy odan ári damytý strategııasyn bekitetin kez keldi», - dep atap ótti sarapshy.

Rızvan Gýseınov bul jaı ǵana Ázerbaıjan men Qazaqstan arasyndaǵy qarym-qatynas emes, búkil Eýrazııanyń áleýeti ekenin basa aıtty. Sondyqtan, ekonomıkalyq, tranzıttik-energetıkalyq, logıstıkalyq saladan bólek, ortaq mádenı mura jáne búgin Bakýde qol qoıylatyn gýmanıtarlyq jobalar men ýaǵdalastyqtar óte mańyzdy bolmaq.

«Túrki halyqtary arasyndaǵy yntymaqtastyq protsesinde, atap aıtqanda, túrki murasyn, onyń álemdik tarıhyn ıgerý men zerdeleýde Qazaqstan árdaıym basty lokomotıvterdiń biri bolyp keledi», - deıdi saıasattanýshy.

Eske sala ketsek, búgin Memleket basshysy Qasym-Jomart Toqaev Ázerbaıjan Prezıdenti Ilham Álıevpen kezdesti jáne ony «Altyn Qyran» ordenimen marapattady.

Sonymen birge, resmı sapar aıasynda qol qoıylǵan qujattar tizimi jarııalandy.

Foto: sputniknews.ru