Qazaqstan men Ázerbaıjan astanalary arasynda tikeleı áýe reısteri qaıta ashylatyn boldy

ASTANA. QazAqparat - Qazaqstan men Ázerbaıjan astanalary arasynda tikeleı áýe reısteri qaıta ashylatyn boldy, dep habarlaıdy Azamattyq avıatsııa komıteti.

QR IIDM Azamattyq avıatsııa komıteti Ázerbaıjan Respýblıkasynyń avıatsııalyq bılik oryndarymen birlesip, halyqaralyq qatynasty qaıta bastaý jáne ashý jónindegi jumys sheńberinde «Ázirbaıjan Hava Iollary» áýe kompanııasynyń Baký – Astana jáne Baký – Almaty baǵyttary boıynsha turaqty jolaýshylar reısterin qaıta jańǵyrtý máselesin pysyqtady.

Osylaısha, Ázerbaıjan áýe kompanııasy aǵymdaǵy jyldyń 10 naýryzynan bastap Baký – Astana baǵyty boıynsha aptasyna 2 reıs jıiligimen (beısenbi, senbi kúnderi), sondaı – aq aǵymdaǵy jyldyń 11 naýryzynan bastap Baký-Almaty baǵyty boıynsha aptasyna 2 reıs jıiligimen (sársenbi, jeksenbi kúnderi) turaqty jolaýshylar reısterin qaıta bastaýdy josparlap otyr. Reıster A-319/E-190/B-757 tıpti áýe kemelerimen oryndalatyn bolady.Qazaqstan men Ázerbaıjan astanalary arasyndaǵy áýe qatynasyn qalpyna keltirý eki el arasyndaǵy saýda-ekonomıkalyq, ınvestıtsııalyq, týrıstik jáne mádenı-iskerlik yntymaqtastyqty odan ári damytýǵa yqpal etetin bolady.