Qazaqstan men Ázerbaıjan arasyndaǵy temirjol tasymaly 3,5 esege artty

BAKÝ. QazAqparat – Bıylǵy 5 aıda Qazaqstan men Ázerbaıjan arasyndaǵy temirjol tasymalynyń kólemi byltyrǵymen salystyrǵanda 3,5 ese artty. Bul týraly Qazaqstan temirjoly ulttyq kompanııasynyń Bakýdegi ókildigi málimdedi, dep habarlaıdy QazAqparat tilshisi.

Máselen, qańtar-mamyr aralyǵynda «Qazaqstan temir joly» UK men «Ázerbaıjan temir joly» JAQ (Jabyq aktsıonerlik qoǵamy) arasyndaǵy tasymaldaý kólemi 1388,1 myń tonnaǵa jetti. Bul ótken jyldyń sáıkes kezeńimen salystyrǵanda 1088,8 tonnaǵa artyq.

Ásirese, Ázerbaıjanǵa astyq jóneltý kólemi artty. ıAǵnı, kórsetkish 128,3 myń tonnany qurady. Al Ázerbaıjan arqyly elimizge keletin munaı ónimderi men qara metal kólemi 13,5 ese ulǵaıyp, 884,6 myń tonna boldy. Ázerbaıjannan jáne osy el arqyly ımporttalatyn taýarlardyń arasynda hımıkattar men as sodasyna suranys joǵary.

Azyq-túlik tasymalynyń ósýine baılanysty tranzıttik tasymaldar da 2 paıyzǵa artyp, 3,1 myń tonnaǵa jetti. Ázerbaıjan agrarlyq zertteýler ortalyǵynyń deregi boıynsha qańtar-mamyr aralyǵynda Qazaqstannan atalaǵan elge 49,1 mln dollarǵa astyq eksporttalǵan. Ázerbaıjan astyq ımportynyń 41,1% elimizdiń úlesinde.