Qazaqstan men Ázerbaıjan arasyndaǵy taýar aınalymy 2,8 mlrd dollardy qurady

ASTANA. QazAqparat - Sońǵy 10 jylda Ázerbaıjannan Qazaqstanǵa ınvestıtsııa kólemi - 168 mıllıon AQSh dollaryn, al Qazaqstannan Ázerbaıjan Respýblıkasyna 20 mln AQSh dollaryn qurady. Bul týraly Parlament Májilisiniń búgingi jalpy otyrysynda QR Qarjy mınıstri Baqyt Sultanov málim etti, dep habarlaıdy «QazAqparat» HAA tilshisi.

Qarjy mınıstri májilismenderden eki el arasyndaǵy hattamany ratıfıkatsııalaýǵa qoldaý bildirýdi surady. Ol hattama QR men ÁR Úkimetteri arasyndaǵy tabys pen múlikke qosarlanǵan salyq salýdy boldyrmaý jáne salyq tóleýden jaltarýǵa jol bermeý týraly konventsııaǵa ózgerister men tolyqtyrýlar engizýge baǵyttalǵan.

«Ratıfıkatsııalaý úshin usynylyp otyrǵan hattama birinshiden, aqparat almasýdy keńeıtý jolymen eki memlekettiń salyq qyzmetteriniń yntymaqtastyǵyn damytýǵa ekinshiden, salyqtan jaltarýlarmen, konventsııa erejelerin teris paıdalaný bolǵan kezde ishki zańnamany qoldanýǵa múmkindik beredi. Sonymen qatar, hattama boıynsha Qazaqstan jáne Ázerbaıjan termınderine ózgerister engizildi. Salyqtardyń ataýlary jańartyldy. Memleketterdegi rezıdenttikti anyqtaýdy retteıtin baptyń erejeleri naqtylandy», - dedi mınıstr.
 

Baqyt Sultanov eki memleket arasynda salyq salý bazasynda osy hattamanyń róli mańyzdy ekenin atap ótip, Ázerbaıjanmen ózara saýda-sattyq týraly statıstıkaǵa toqtaldy.

«Sońǵy 10 jylda  Qazaqstan men Ázerbaıjan arasyndaǵy taýar aınalymy 2,8 mıllıard AQSh dollaryn qurady. Qazaqstandyq eksporttyń negizgi baptary - bıdaı, shıki munaı ónimderi jáne temirden jasalatyn buıymdar bolyp tabylady. Import qurylymynda qant jáne orman jaraqtary basym. Sońǵy 10 jylda Ázerbaıjannan Qazaqstan Respýblıkasyna ınvestıtsııalar 168 mıllıon AQSh dollaryn qurady. Al Qazaqstannan Ázerbaıjan Respýblıkasyna 20 mln AQSh dollaryna jaqyn», - dedi ol.

Talqylaýdan keıin Palata depýtattary zań jobasyn qabyldady.