Qazaqstan men Ázerbaıjan arasyndaǵy kólik-logıstıkalyq yntymaqtastyqty jandandyrýǵa aıryqsha kóńil bólinýde - sarapshy

NUR-SULTAN. QazAqparat – Ázerbaıjanmen saýda-ekonomıkalyq baılanystardy damytý strategııalyq mańyzǵa ıe bolyp keledi. Mundaı pikirdi QR Prezıdenti janyndaǵy Qazaqstan strategııalyq zerteýler ınstıtýty halyqaralyq jáne geoekonomıkalyq zertteýler bóliminiń basshysy Aıdar Qurmashev bildirdi, dep habarlaıdy QazAqparat tilshisi.

«Geoekonomıkalyq ahýal álemniń kóptegen eliniń ekonomıkasyna aıtarlyqtaı yqpal etedi. Osyǵan baılanysty syrtqy ekonomıkalyq jáne saýda qatynastaryn ártaraptandyrý boıynsha belsendi qadamdar jasalyp jatyr. Qazaqstannyń shynaıy odaqtasy ári túrki áleminiń negizgi oıynshylarynyń biri Ázerbaıjanmen saýda-ekonomıkalyq baılanystardy damytý strategııalyq mańyzǵa ıe. Bizdiń elderimizdiń uqsas múddeleri bar – ekonomıkanyń shıkizattyq emes sektoryn damytý jáne kólik-kommýnıkatsııalyq áleýetti keńeıtý. Bul yntymaqtastyq úshin jaqsy múmkindikter týǵyzady», - dedi Aıdar Qurmashev agenttik tilshisine telefon arqyly bergen suhbatynda.

Sarapshynyń pikirinshe, Qazaqstan Prezıdentiniń Bakýge sapary eki eldiń ózara is-qımylyn jedeldetýde tarıhı mańyzǵa ıe bolady.

«Búginde Transkaspıı halyqaralyq kólik baǵyty arqyly jetkizý logıstıkasy men taýarlar tranzıti tıimdiliginiń jetkiliksiz ekendigi baıqalady. Sondyqtan saýda-ekonomıkalyq jáne kólik-logıstıkalyq yntymaqtastyqty jandandyrýǵa erekshe nazar aýdarý keme jasaý, munaı óndirýge arnalǵan jabdyqtar óndirisi jáne energııa resýrstaryn tasymaldaý boıynsha tabysty ózara is-qımyl jasaýǵa serpin bere alady. Menińshe, taǵy bir mańyzdy másele – aqparat almasýdaǵy kemshilikter. Elderimiz jarııa dıplomatııanyń barlyq tetikterin iske qosyp, mádenı-gýmanıtarlyq salada turaqty birlesken is-sharalar uıymdastyrýy qajet. Bul óz kezeginde B2B ǵana emes, elderimizdiń azamattary arasyndaǵy kommýnıkatsııany keńeıtýge múmkindik beredi», - dedi Aıdar Qurmashev.