Qazaqstan men Ázerbaıjan arasyndaǵy áýe qatynasy 1 tamyzda jandanýy múmkin

NUR-SULTAN. QazAqparat - Qazaqstan Respýblıkasy Indýstrııa jáne ınfraqurylymdyq damý mınıstri Beıbit Atamqulov Ázerbaıjan Respýblıkasynyń Kólik, baılanys jáne joǵary tehnologııalar mınıstri Ramın Namıg ogly Gýlýzademen telefon arqyly sóılesti, dep habarlaıdy QazAqparat vedomstvoǵa silteme jasap.

Taraptar kólik tasymaly, júk tranzıti, áýe qatynasy sııaqty salalardaǵy ekijaqty yntymaqtastyqtyń qazirgi jaǵdaıy týraly aqparat almasty. Koronavırýs pandemııasynyń taralýyna qarsy engizilgen ýaqytsha shekteý sharalaryna qaramastan temirjol jáne avtomobıl kóligimen júk tasymaly kólemi artqan.

Ótken jyly Qazaqstan men Ázerbaıjan arasynda avtokólikpen júk tasymaldaý kólemi 22 myń tonnany qurady. Qazaqstan temir jolymen júk tranzıtiniń kólemi 38,66 myń tonnany qurap, 32% artty.. Byltyr sáýir aıynda Aqtaý-Baký fıderlik jelisiniń ashylýy arqasynda konteınerlik tasymal kólemi 14,7 myń JFB-dan 24,8 myń JFB-ǵa deıin ósti.

Koronavırýstyq ınfektsııanyń taralýyna jol bermeý maqsatynda búgingi tańda Aqtaý jáne Quryq teńiz porttary arqyly jolaýshylar tasymalyna ýaqytsha tyıym salynǵanyn aıtý kerek. Biraq, onyń Otanǵa oralatyn Qazaqstan azamattaryna qatysy joq. Al júk tasymaly shtattyq rejımde oryndalýda.

Bıylǵy 6 aıda tasymal kólemin 1 mln tonnaǵa deıin jetkizý josparlanyp otyr. Bul ótken jyldyń tıisti kezeńimen salystyrǵanda 17% kóp.

Sondaı-aq taraptar epıdemıologııalyq jaǵdaıǵa qaraı eki el arasyndaǵy áýe qatynasyn 1 tamyzdan qaıta bastaý týraly máseleni qarastyrýǵa kelisti. Qazirgi kelisimge sáıkes ár tarapqa aptasyna 16 jolaýshy jáne júk reısin oryndaýǵa ruqsat etilgen.

Eske sala keteıik, koronavırýs pandemııasyna baılanysty shekteý sharalary engizilgenge deıin qazaqstandyq áýe kompanııalary («Eır Astana», «SCAT») aptasyna 13 reıs jasap keldi.

Al Ázerbaıjannyń áýe kompanııalary («AZAL», «Silk Way West») aptasyna 5 reıs oryndaıtyn.