Qazaqstan men Armenııa arasynda resmı qujattardy tanýdyń ońaılatylǵan tártibi belgilendi
«Kelisim ekijaqty halyqaralyq shart bolyp sanalady jáne Qazaqstan Respýblıkasy men Armenııa Respýblıkasynyń ýákiletti organdary bergen rezıdenttikti rastaıtyn resmı qujattardy taný tártibin jeńildetý maqsatynda jasaldy. Atalǵan tártip eki memlekettiń salyq tóleýshilerine apostıl qoıýsyz rezıdenttigin rastaıtyn qujatty salyq agentine usynýǵa múmkindik beredi», - dedi Premer-Mınıstrdiń birinshi orynbasary – Qarjy mınıstri Álıhan Smaıylov.
Onyń sózine qaraǵanda, mundaı retrospektıvti tártip eki memlekettiń salyq tóleýshilerine qosarlanǵan salyq salý qaýpin boldyrmaýǵa múmkindik beredi.
«Osy Kelisim bizdiń elderimizdiń ári qaraı
qarym-qatynasynyń damýyna baǵyttalǵan Eýrazııalyq ekonomıkalyq odaq aıasyndaǵy sharalardyń biri bolyp otyr. Kelisimdi iske asyrý memlekettik bıýdjetten qarjy shyǵyndaryn talap etpeıdi», - dedi Á. Smaıylov.
Jalpy otyrystaǵy talqylaýdan keıin palata depýtattary «2006 jylǵy 6 qarashadaǵy Qazaqstan Úkimeti men Armenııa Úkimeti arasyndaǵy Tabys pen múlikke salynatyn salyqtarǵa qatysty qosarlanǵan salyq salýdy boldyrmaý jáne salyq salýdan jaltarýǵa jol bermeý týraly konventsııa jáne oǵan Hattama sheńberinde Qazaqstan men Armenııa ýákiletti organdary bergen rezıdenttikti rastaıtyn resmı qujattardy taný tártibi týraly notalar almasý nysanyndaǵy kelisimdi ratıfıkatsııalaý týraly» Zańdy qabyldady.