Qazaqstan men álem quramalary kezdesýine qatysatyn shahmatshylar anyqtaldy

ASTANA. QazAqparat - Astana qalasynda FIDE-niń 2023 jylǵy álem chempıonaty aıasynda ótetin áıelder arasyndaǵy Qazaqstan men álem quramalary kezdesýine qatysatyn oıynshylar tizimi belgili boldy, dep habarlaıdy QazAqparat tilshisi.

Atalǵan kezdesýge álem quramasyn áıelder arasyndaǵy reıtıngtiń kóshbasshysy, qytaılyq Hoý Ifan bastap keledi.

Sondaı-aq, qurama sapynda grýzııalyq Nana Dzagnıdze men úndistandyq Harıka Dronavallı, ázerbaıjandyq Gıýnaı Mamedzade, bolgarııalyq Nýrgıýl Salımova, majarstandyq Zsoka Gaal, ózbekstandyq Afrýza Hamdamova bar.

Al Qazaqstan quramasynda Jansaıa Ábdýmálik, Dınara Sádýaqasova, Bıbisara Asaýbaeva, Merýert Kamalıdenova, Lııa Qurmanǵalıeva, Ksenııa Balabaeva, Alýa Nurmanova, Zarına Nurǵalıeva saıysqa túsedi.

Qazaqstan men álem quramalary 17-18 sáýirde rapıd, 19 sáýirde blıtsten sheberlik baıqasady. Árbir qurama 8 oıynshydan tirkeıdi. Onyń ishinde 4-i 20, 18, 16 jáne 14 jasqa deıingi sanatqa deıingi shahmatshy bolýy kerek. Olar óz jas sanaty boıynsha bir-birimen oınaıdy.

Eske salsaq, Bıbisara Asaýbaeva Úndistandaǵy týrnırdiń 9-týrynan keıin birinshi orynda keledi.