Qazaqstan men AQSh-tyń áskerı ınjenerleri birlesken jattyǵýlar ótkizedi

ASTANA. QazAqparat - Qazaqstan men Amerıka Qurama Shtattary Qarýly Kúshteri delegatsııasynyń kezdesýi barysynda mınasyzdandyrý jumystaryn damytý aıasyndaǵy yntymaqtastyq máselesi talqylandy. Eki eldiń mamandary Qazaqstan Qarýly Kúshteriniń mınasyzdandyrý ortalyǵy men «Bereg» oqý-jattyǵý ortalyǵyn damytýǵa qatysty oı-pikirlerimen bólisti, dep habarlaıdy elimizdiń Qorǵanys mınıstrliginiń baspasóz qyzmeti.

Sondaı-aq, atalmysh salada aqparattyq, ádistemelik jáne oqý-materıaldyq bazany jetildirý aıasynda ekijaqty yntymaqtastyq máselelerin kelisti. Sonymen birge, taraptar jerdi tazalaý, qaýipti jarylǵysh zattar men qoldan jasalǵan jarylǵysh qurylǵylarǵa qarsy turý taqyryby boıynsha daıyndyq ádistemesin ázirleý boıynsha nusqaýshylar men mamandardy oqyp-úıretý qajettiligi máselelerinde ortaq pikirge keldi.

Qazirgi ýaqytta Qazaqstan Qarýly Kúshteri ınjenerlik áskerleriniń áskerı qyzmetshilerin AQSh Qarýly Kúshteriniń oqý-jattyǵý ortalyqtaryna oqýǵa jiberý, sondaı-aq, birlesken sabaqtar men jattyǵýlardy ótkizý úshin eki eldiń nusqaýshylaryn tartý boıynsha ýaǵdalastyq ázirlenýde.

Qosymsha QR QK Mınasyzdandyrý ortalyǵynyń kınologııalyq qyzmetin damytý jóninde pozıtsııalar ázirlenýde.