Qazaqstan memlekettik qyzmetterdiń jahandyq shlıýzin qurý týraly bastama kóterdi
Bul týraly QazAqparat mınıstrliktiń baspasóz qyzmetine silteme jasap habarlaıdy.
Otyrys barysynda mınıstrlik basshysy sheteldik áriptesterine Qazaqstannyń tsıfrlandyrý salasyndaǵy jetistikteri, memlekettik qyzmetterge ınnovatsııalardy engizý barysy jaıly aıtyp, sondaı-aq memlekettik qyzmetterdiń jahandyq shlıýzin ázirleý boıynsha usynys bildirdi.
Baǵdat Mýsın qazirgi zamanǵy jaǵdaılar - azamattardyń ómirin jeńildetý úshin, mysaly, olarǵa «tsıfrlyq pasporttar» men basqa da qujattardy paıdalanýǵa múmkindik berý úshin ártúrli elderdiń memlekettik aqparattyq júıelerin ıntegratsııalaýdy talap etetinin atap ótti.
«Biz aqparattyq júıelerdiń memleketaralyq ıntegratsııasy týraly baıypty oılanýymyz kerek. Azamattarymyzdyń, bıznes pen memlekettik bılik organdarynyń ózara is-qımylyn neǵurlym yńǵaıly jáne adamǵa baǵdarlaý bizdiń basty maqsatymyz bolýy tıis. Integratsııalaýdyń paıdasy týrızm, medıtsına, saýda, bilim sııaqty túrli salalarǵa oń áser etetini aıqyn. Men Halyqaralyq Elektr baılanysy odaǵy osy baǵytta bastama kóteretinine senemin» -dedi mınıstr.
Alaıda, onyń aıtýynsha, mundaı aýqymdy jobany júzege asyrý úshin naqty ádisteme, standarttar men erejeler qajet.
Baǵdat Mýsın Qazaqstan úkimeti bul turǵyda kómek kórsetýge ázir ekenin atap ótti.
Baǵdat Mýsınniń bastamasyn halyqaralyq elektrbaılanys odaǵynyń Bas hatshysy Hoýlın Chjao qoldap, tıisti bıýroǵa osy máseleni pysyqtaý boıynsha arnaıy top qurýdy tapsyrdy.
Sondaı-aq, forým aıasynda QR Tsıfrlyq damý, ınnovatsııalar jáne aeroǵarysh ónerkásibi mınıstri Baǵdat Mýsın Halyqaralyq Elektr baılanysy odaǵynyń standarttaý bıýrosy zertteý toptary departamentiniń basshysy Bılal Djamýssımen ekijaqty kezdesý ótkizdi.
Kezdesý barysynda Baǵdat Mýsın departamenttiń osy uıymǵa múshe elderdiń, ásirese Qazaqstannyń tehnologııalyq damýyna qosqan úlesin atap ótip, Bılal Djamýssıdi qyrkúıek aıynda Nur-sultan qalasynda ótetin Digital Bridge 2022 forýmyna qatysýǵa shaqyrdy.
Foto: gov.kz