Qazaqstan mektepterinde elektrondy kitaphana júıesi engizile bastady

<p>El mektepterinde kitaphana qoryn tolyq qamtamasyz etetin «Qazaq mura» biregeı júıesi iske qosyldy. Bul — oqýshylardyń kitap oqý quzyrettiligin qalyptastyrýǵa múmkindik beretin jańa baǵyt. Júıe ásirese ádebıetke qoly jete bermeıtin aımaqtardaǵy kitaphana jumysyn birshama ońtaılandyrmaq. Bul týraly platformany ázirleýshiler tobynyń jetekshisi Muqataı Málik aıtty, dep habarlaıdy <a href="https://kaz.inform.kz/" target="_blank" rel="noopener">Kazinform</a>.</p>

Aıtýynsha, platforma Ulttyq kitap palatasymen ıntegratsııalanǵan. Ol aýqymdy kitap qoryna tegin ári shekteýsiz qol jetkizýge múmkindik berip qana qoımaı, barlyq mektepterden aqparat jınap, naqty derekti de usyna alady.

«Tsıfrlyq kitaphana júıesin daıyndaýǵa 3 jyldan astam ýaqyt jumsaldy. Kitaphana salasyn tsıfrlandyrý qazirgi bilim berýdegi zamanaýı baǵyt. Búgingi tańda elimizde kitaphana qory týraly tolyq aqparat joq. Sondyqtan Qazaqstannyń mektep kitaphanalarynyń jumysyn tsıfrlandyrý men avtomattandyrý boıynsha biraz jumys qolǵa alyndy. ıAǵnı, kitaphanashylar ǵana emes, oqyrman, baspalar jáne bilim basqarmasy men mınıstrlik ókilderi de júıege qosyla alady. Platforma kitaphana aqparatyna negizdelgen qujat aınalymy jumysyn ońtaılandyryp, kitaphana qoryn basqarýǵa múmkindik beredi», — deıdi Muqataı Málik.

Joba avtory jańa júıe kitaphanashylardyń jumysyn avtomattandyryp qana qoımaı, «OQU» mobıldi qosymshasyn usynatynyn jetkizdi.

«Qazaqstandyq oqýshylarǵa álemdik klassıkany tek túpnusqasynda ǵana emes, sonymen qatar qazaq tilinde de tegin oqýǵa múmkindik beredi. Atalmysh qosymshada ár oqýshy kez kelgen kitapqa tapsyrys berip, onyń qorda bar-joǵyn teksere alady. Tsıfrlyq kitaphana — qala men aýyl kitaphanasyn damytýǵa baǵyttalǵan. Bul óskeleń urpaqty kitap oqýǵa yntalandyryp, mádenı muranyń saqtalýyna da zor septigin tıgizbek», — deıdi ol.

Búginde bul júıege Almatynyń birqatar mektebi qosyldy.

«Jańa júıeniń kitaphanaǵa tıgizer kómegi zor. Atap aıtsam, qujattardy paıdalanýymyzǵa jáne kitaphana qoryn basqarýǵa múmkindik beredi. Kitaptardyń elektrondy nusqasy bar jáne Oqý aǵartý mınıstrligi usynǵan kitap tizimin qarap, erkin qol jetkizýge bolady», — deıdi № 19 mekteptiń kitaphana meńgerýshisi Aınagúl Amanjolova.

Kitaphanany tsıfrlandyrý jobasy jańa oqý jylynda qazaqstandyq mektepterdi tolyq qamtymaq.