Qazaqstan mektepterinde shahmat mindetti pánge aınalaýy múmkin

ALMATY. QazAqparat - Qazaqstan shahmat federatsııasynyń vıtse-prezıdenti Dármen Sádýaqasov federatsııanyń josparlarymen bólisti, dep habarlaıdy QazAqparat tilshisi.

«Federatsııanyń maqsaty – shahmatty keńinen nasıhattaý arqyly ıntellektýaldy ult qalyptastyrý. Teń múmkindikterdi qurý. Bizdiń eki ambıtsııamyz bar. Birinshisi – shahmatty mektep baǵdarlamasyna mindetti pán retinde engizý bolsa, ekinshisi – bizdiń erler, áıelder jáne balalar komandalary álemniń úzdik ondyǵyna turaqty túrde enýi», – dedi Dármen Sádýaqasov jýrnalıstermen kezdesýinde.

Onyń aıtýynsha, 2023 jyldan bastap Qazaqstannyń keıbir mektepterinde shahmat jańa fakýltatıv pán retinde oqytylady.

«Federatsııa daıyndyq jumystaryn júrgizedi. Áńgime orys jáne qazaq tilindegi oqýlyqtar men oqý-ádistemelik keshenderdi daıyndaý týraly bolyp otyr. Mundaı aýqymdy jospardy júzege asyrý úshin ustazdardy daıyndaý qajet. Ol úshin elimizdegi pedagogıkalyq joǵary oqý oryndary arnaıy kafedralar ashýdy kózdep otyr», - dedi ol.

Federatsııa 2027 jylǵa qaraı shahmat Qazaqstannyń barlyq aımaǵynda mindetti pánge aınalady dep josparlap otyr.

«Shahmat kóp nárseni úıretedi jáne ádil básekelestik pen merıtokratııa qaǵıdattaryn sińiredi. Búginde elimizde 50 myńnan astam bala shahmat oınaıdy», - dep qosty Sádýaqasov.