Qazaqstan mektepterinde qansha psıholog jumys istep júr
Memlekettik hatshy «Rýhanı jańǵyrý», «Prezıdenttiń bes áleýmettik bastamasy» baǵdarlamalary qoǵamdyq sanany jańǵyrtýǵa jáne ómir súrý sapasyn arttyrýǵa baǵyttalǵanyn atap ótti. Bul turǵyda óskeleń urpaqtyń rýhanı-adamgershilik qasıetterin damytý jáne olardyń quqyqtary men zańdy múddelerin qamtamasyz etý máseleleri erekshe mánge ıe bolyp otyr.
Bilim jáne ǵylym mınıstrliginiń aqparaty boıynsha Qazaqstanda balalardyń quqyqtary men múddelerin qamtamasyz etý úshin ınstıtýtsıonaldyq negiz qurylǵan. Bul rette 15 halyqaralyq qujat ratıfıkatsııalandy, Balalar quqyqtary jóninde ýákil ınstıtýty, Balalardyń quqyqtaryn qorǵaý komıteti, qıyn ahýaldaǵy balalarǵa qoldaý kórsetý ortalyqtary jumys isteýde.
Aıta keteıik, qanatqaqty joba retinde 71 bilim berý uıymynda tutas pedagogıkalyq protseste «Ózin-ózi taný» adamgershilik-rýhanı bilim berý baǵdarlamasy iske asyrylýda. Sonymen qatar, Bas prokýratýramen birlese kámeletke tolmaǵandar arasyndaǵy zorlyq-zombylyqtyń aldyn alýǵa negizdelgen «Balalardy birge qorǵaımyz» atty jol kartasy eúzege asyrylýda. Búginde mektepterde 8 362 psıholog, 4 268 áleýmettik pedagog, 2 177 polıtsııa ınspektorlary jumys isteıdi.
Budan bólek, Densaýlyq saqtaý mınıstrliginiń málimetine súıensek, elimizde ana óliminiń deńgeıi 2017 jyly 1,5 paıyzǵa, balalar ólimi 7 paıyzǵa tómendedi. Óńirlerde 60 úkimettik emes uıymdardyń qatysýymen otbasyn josparlaý, ana men bala densaýlyǵyn qorǵaý boıynsha 112 áleýmettik joba iske asyryldy. Bes jasqa deıingi balalarǵa patronajdyq profılaktıkalyq baqylaý júrgizilip, 600- den astam balalar densaýlyǵy bólmeleri uıymdastyryldy.