Qazaqstan mektepterinde ekologııalyq tárbıe sabaǵy engiziledi

NUR-SULTAN. - Qazaqstan mektepteri men balabaqshalaryna ekologııalyq tárbıege arnalǵan qosymsha sabaq engiziledi. Bul týraly QR Ekologııa, geologııa jáne tabıǵı resýrstar mınıstri Maǵzum Myrzaǵalıev #birge #TazaQazaqstan ekologııalyq aktsııasynda málim etti, dep habarlaıdy QazAqparat tilshisi.

«QR bilim jáne ǵylym mınıstrligimen birlese otyryp, barlyq mektepter men balabaqshalarda ekologııalyq saǵattardy iske qosamyz. Óıtkeni tazalyq uǵymyn sanaǵa bala jastan bastap sińirý kerek», - dedi mınıstr Maǵzum Myrzaǵalıev.

QR Parlamenti Májilisiniń depýtaty Zaǵıpa Balıevanyń aıtýynsha, «ekologııalyq saǵattar» qosymsha sabaq retinde engizilýi tıis.

«Ekologııa mınıstri men bilim mınıstri ózara kelisip, jańa pándi engizý tetikterin oılastyrady dep oılaımyn. Bul qosymsha sabaq túrinde bolýy kerek. Qoqysty suryptap tógý, oǵan qaıta óńdeletin shıkizat retinde qaraý mádenıetin qalyptastyrýdy balalardan bastaý ıdeıasy - shynymen de jaqsy bastama», - dedi depýtat.

Eske salsaq, búgin QR ekologııa, geologııa jáne tabıǵı resýrstar mınıstri Maǵzum Myrzaǵalıev jarııalaǵan #Birge #TazaQazaqstan aktsııasyna Nur-Sultan qalasynan 1200-den astam adam qatysqan bolatyn. Onyń ishinde Úkimet basshysy Asqar Mamın de bar.