Qazaqstan mektepterinde áskerı-patrıottyq synyptar ashylady
Bul týraly QR Qarýly Kúshteriniń Bas shtaby bastyǵynyń orynbasary, «Jas sarbaz» respýblıkalyq balalar men jasóspirimder qozǵalysynyń tóraǵasy, general-maıor Muhamedjan Talasov Ortalyq kommýnıkatsııalar qyzmetinde málimdedi.
M. Talasov Memleket basshysynyń bıylǵy Joldaýynda halyqtyń ál-aýqatyn jaqsartýmen qatar, mektepterdegi áskerı-patrıottyq tárbıeniń rólin kúsheıtýdi tapsyrǵanyn atap ótti.
«Jastarǵa áskerı-patrıottyq tárbıe berýde birqatar qıyndyqtar kezdesedi. Eń aldymen, turaqty qarjylandyrý kózi men jetkilikti quqyqtyq jáne oqý-materıaldyq bazanyń bolmaýy ózekti. (...) Mektepter janynan qurylǵan áskerı-patrıottyq uıymdar, synyptar, sektsııalar men úıirmeler syndy jastar uıymdary bir júıege toǵyspaǵan», - dep túsindirdi ol.
M. Talasov 2016 jyly «Jas sarbaz» áskerı-patrıottyq qozǵalysy qurylǵanyn eske saldy. Onyń quramyna memlekettik organ ókilderi, «Nur Otan» partııasynyń «Jas Otan» jastar qanaty, qoǵamdyq jáne jastar uıymdarynyń ókilderi bar.
«Memleket basshysynyń bıylǵy Joldaýy aıasynda jastarǵa áskerı-patrıottyq tárbıe berý jumystaryn jetildirý úshin «Jas sarbaz» qozǵalysynyń óńirlik shtabtaryn qurýdy, óńir ákimderiniń jetekshiligimen qozǵalysty damytý boıysha úılestirý keńesterin qurýdy josparlap otyrmyz. QR Bilim jáne ǵylym mınıstrligimen jáne jergilikti atqarý organdarymen birlesip, elimizdiń ár mektebinde áskerı-patrıottyq klýbtar men 5-11 synyp oqýshylary úshin áskerı mamandandyrylǵan synyptar ashý da kózdelgen», - dep atap ótti M. Talasov.
Onyń aıtýynsha, mundaı synyptardyń qurylýy tártip pen oqý úlgerimin arttyrýǵa, oqýshylardyń belsendi azamattyq pozıtsııasyn qalyptastyrýǵa, múmkindik beredi. Aldaǵy ýaqytta mamandandyrylǵan synyptar men klýb tárbıelenýshileri biryńǵaı formamen qamtamasyz etiledi.