Qazaqstan mektepteri men JOO-laryndaǵy sabaqtar patrıottyq baǵytta júrgiziledi

ASTANA. QazAqparat - Qazaqstan mektepteri men joǵary oqý oryndaryndaǵy sabaqtar patrıottyq baǵytta júrgiziledi. Bul týraly búgin QR Memlekettik hatshysy Gúlshara Ábdiqalyqovanyń tóraǵalyǵymen ótken Qazaqstan Prezıdenti janyndaǵy Áıelder isteri jáne otbasylyq-demografııalyq saıasat jónindegi ulttyq komıssııanyń kezekti otyrysy aıasynda BAQ ókilderine Bilim jáne ǵylym vıtse-mınıstri Tahır Balyqbaev málim etti.

«Bizderde Qazaqstan tarıhy, saıasattaný, qoǵamtaný jáne mádenıettaný syndy jekelegen pánder bar. Mine osy jáne ózge de pánderge «Máńgilik El» ıdeıasyn jáne ondaǵy ustanymdar men qundylyqtardy qosatyn bolamyz. Bular sońǵy ýaqytta Memleket basshysynyń sóz sóıleýlerinde kóterilgen qundylyqtar. Eger orta bilim berý salasyn alar bolsaq, onda jekelegen pánder men baǵdarlamalarǵa «Máńgilik El» men «Uly dala eli» elementteri kirgiziledi», - dedi ol.

Onyń atap ótýinshe, mundaı sharalar tárbıelik jumystardy da qamtıtyn bolady.

«Biz qazirgi ýaqytta tárbıe jumystarynyń jańa tujyrymdasyn ázirledik. Onyń 8 baǵyty bar. Eń basty baǵyty - bul qazaqstandyq patrıotızmge tárbıeleý. Ol «Máńgilik El» jáne «Uly dala eli» ıdeıasy qundylyqtaryna negizdeledi», - dedi T.Balyqbaev.

Sonymen qatar vıtse-mınıstr mektepter men joǵary oqý oryndaryna jańa pánderdiń qosylmaıtyndyǵyn atap ótti.