Qazaqstan Majarstanǵa «Býdapesht – Almaty – Býdapesht» áýe reısin ashýdy usyndy

NUR-SULTAN. QazAqparat – Qazaqstan Majarstan úkimetine Almaty men Býdapesht arasynda áýe reısin ashýdy usyndy. Bul týraly QR Premer-Mınıstriniń orynbasary – Syrtqy ister mınıstri Muhtar Tileýberdi aıtyp berdi, dep habarlaıdy QazAqparat tilshisi.

Mınıstr qyrkúıekte Nur-Sultan men Býdapesht arasyndaǵy turaqty áýe qatynas qalpyna keltirilgenin eske saldy. Reısterdi «WizzAir» majar áýe kompanııasy oryndaıdy.

«Jaqynda Úkimet sheshimimen reısterdiń jıiligi aptasyna eki reıske deıin arttyryldy. Osyǵan oraı, majar tarapyna ekinshi reısti Býdapesht – Almaty – Býdapesht baǵyty boıynsha iske qosýdy usyndyq. Búgingi tańda elimizdiń 800-den astam azamaty Majarstannyń aldyńǵy qatarly joǵary oqý oryndarynda bilim alýda. «Stıpendıým Hýngarıkým» majar bilim berý baǵdarlamasy sheńberinde majar tilinde oqýǵa qyzyǵýshylyq tanytqan stýdentter sany artyp keletinin atap ótý qajet», - dedi Syrtqy ister mınıstri.

Onyń aıtýynsha, kelissózder qorytyndysy boıynsha Strategııalyq keńestiń 5-shi otyrysynyń hattamasyn qabyldanǵan.

«Mıhaı Varga myrzanyń sapary jáne búgingi kelissózderimizdiń qorytyndylary eki el arasyndaǵy ekijaqty jáne kópjaqty formattaǵy seriktestik qarym-qatynastardy tereńdetýge qosymsha serpin beredi dep senemin», - dedi Muhtar Tileýberdi.

Aıta keteıik, QR Premer-Mınıstriniń orynbasary – Syrtqy ister mınıstri Muhtar Tileýberdi Majarstan Premer-mınıstriniń orynbasary, Qarjy mınıstri Mıhaı Vargamen kezdesti. Mınıstr qos memleket arasyndaǵy saıası dıalog joǵary deńgeıde ekenin, Qazaqstan men Majarstan bir-biriniń halyqaralyq arenadaǵy bastamalary men kúsh-jigerin qoldap kele jatqanyn aıtqan edi.