Qazaqstan Mazarı-Sharıf– Kabýl –Peshavar temirjolynyń qurylysyna qatysýǵa daıyn – Prezıdent

NUR-SULTAN. QazAqparat – Ortalyq Azııa memleketteri basshylarynyń IV Konsýltatıvtik kezdesýinde Qasym-Jomart Toqaev Qazaqstannyń «Mazarı-Sharıf – Kabýl –Peshavar» temirjolynyń qurylysyna qatysýǵa daıyn ekenin málim etti, dep habarlaıdy QazAqparat tilshisi.

«Tórtinshi. Óńirde kólik baılanysyn arttyryp, tranzıt sharttaryn dáıekti túrde jaqsartý qajet. Tipti óńirdiń kartasyna asyǵys kóz tastaǵan adamnyń ózi Ortalyq Azııanyń ornalasqan geografııalyq jaǵdaıy biregeı ekenin kóredi.

Jańa geosaıası ahýal jaǵdaıynda bizdiń óńirdiń kontınentaralyq saýda-sattyqty damytý men ilgeriletý jolyndaǵy róli ekpindep ósip keledi», - dedi Qasym-Jomart Toqaev.

Prezıdent Qazaqstan bul turǵyda Transkaspıı halyqaralyq kólik marshrýtyn belsendi damytyp jatqanyn eske saldy.

«2017 jyldan bastap osy dáliz arqyly konteıner tasymaldaý 3 esedeı ósti. Onyń ústine Qazaqstan «Mazarı-Sharıf – Kabýl –Peshavar» temirjolynyń qurylysyna qatysýǵa daıyn.

Biz qurylymy joǵary taýarlardyń úzdiksiz jetkizilýin qamtamasyz etip, jyljymaly quram usyna alamyz», - dedi Memleket basshysy.

Aıta keteıik, Qyrǵyz Respýblıkasynyń Sholpan-Ata qalasynda Ortalyq Azııa memleketteri basshylarynyń IV Konsýltatıvtik kezdesýi ótip jatyr.

Jıynǵa Qazaqstan, Qyrǵyzstan, Tájikstan, Túrikmenstan, Ózbekstan kóshbasshylary qatysýda.

Buǵan deıin Qazaqstan Prezıdenti Qasym-Jomart Toqaevtyń Qyrǵyzstannyń Sholpan-Ata qalasyna barǵanyn jazǵan bolatynbyz.